Bakı işğaldan azad edilməsəydi... - Millət vəkili

"100 il əvvəl sentyabrın 15-də Bakının azad edilməsinə Azərbaycanın xilası tarixi kimi baxılmalıdır. Bakı işğaldan azad edilməsəydi, Azərbaycan dövlətinin rəsmən tanınması mümkün olmayacaqdı".

Sonxeber.az xəbər verir ki, bu sözləri Publika.az-a açıqlamasında millət vəkili Fazil Mustafa deyib.

Millət vəkili bildirib ki, Bakının işğaldan azad edilməsi ciddi bir tarixi uğurdur:

"Nuru Paşanın komandanlığı altında Qafqaz İslam ordusu Bakını azad edəndən sonra Azərbaycan höküməti Bakıya köçdü. Bundan sonra Fətəli xan Xoyski hökümətin fəaliyyəti ilə bağlı idarəçiliyi əlində saxlayan ingilis işğalçı qüvvələrinin komandanına inandırıcı məlumatlar verə bildi. Bakı işğaldan azad olunmasaydı, Azərbaycan bayrağının bu ərazidə qaldırılması mümkün olmayacaqdı. Ona görə də 15 sentyabr bizim üçün çox önəmli bir tarixdir. Bu tarixin qeyd olunması "mümkün olmayanı etmək mümkündür" kimi bir motivasiya da yarada bilər. Çünki Bakı həmin dövrdə işğalçı qüvvələrin əlində idi və Türk ordusu olmasaydı, Bakını həmin qüvvələrdən azad etmək problem olacaqdı. Bu məsələyə həm də o zaman həyatını itirmiş yüzlərlə türk əsgərinə qarşı bir vəfa borcu olaraq baxılmalıdır. Onlar uzaq diyarlardan gələrək Azərbaycan əsgərini təlimləndirərək, onlarla birlikdə belə əhəmiyyətli bir hadisədə iştirak ediblər".

Millət vəkili hesab edir ki, Bakının azad edilməsi nə qədər əhəmiyyətli hadisə olsa da, ona tam layiq olduğu diqqət göstərilməyib:

"Ən böyük nöqsanlarımızdan biri həmin günə lazımi dəyəri verməməyimizdir. Bu tarixə laqeyd yanaşmaq olmaz. Bu həm də bizim təkrar olunan tariximiz ola bilər. İnsanlar anlamalıdırlar ki, bu cür dar günlərdə biz Anadolu türklərinin yardımına çatdığımız kimi, onlar da bu duyğunu daşımalıdır. Buna görə də həmin hadisədə iştirak edən hər kəsin xatirəsinə dəyər verməliyik. Lakin yetərincə dəyər verməmişik, hələ də, Nuru Paşanın adına küçə, heykəl yoxdur. Hesab edirəm ki, bunlar edilməlidir. Sevindirici haldır ki, ölkə rəhbərliyi bu istiqamətdə çox gözəl bir addım atdı. Bakının işğaldan azad olunmasının 100 illiyində, yəni 15 sentyabrda hərbi paradın keçirilməsi möhtəşəm bir qərardır, bu, həm də onların ruhuna bir sayğıdır.

Unutmayaq, Azərbaycanı, Bakını Azərbaycan əsgəri ilə birlikdə türk əsgəri xilas edib, burada mindən artıq şəhid veriblər, erməni vandallarından qisasımızı alıblar. Onların ruhu qarşısında biz də Azərbaycan dövləti olaraq, millət olaraq borcumuzu hər zaman xatırlamalıyıq, şükranlığımızı ortaya qoymalıyıq. Milli qəhrəmanımız Nuri Paşanın adının məhz Azərbaycanda əbədiləşdirilməsi məsələsinin yaxın zamanda həll ediləcəyinə inanıram".

Telegramda izləyin

instagramda izləyin