Qatardakı nasazlıqlar peşəkar kadrların metrodan getməsinə görədir- iddiasına RƏSMİ CAVAB
"Bakı metro stansiyalarında qatar nasazlıqları ilə xəttən çıxarılmanın statistikası göstərir ki, bu sahədə problemlər xeyli aradan qaldırılıb. 2013-cü ilin nəticələrinə əsasən, 520-dan çox belə hal qeydə alındığı halda, 2017-ci ildə bu göstərici təqribən 127 hala endirilib. Təxminən 4 dəfə azalma baş verib. Əgər peşəkar kadrlar Bakı Metropolitenini tərk edirsə, niyə bu nasazlıq hallarının sayı xeyli aradan qaldırılıb?". Bunu Sonxeber.az-a "Bakı Metropoliteni" QSC-nin mətbuat xidmətinin rəhbəri Bəxtiyar Məmmədov deyib.
Qatarda 113 xarab olan detal var
Onun sözlərinə görə, sadəcə olaraq qatardakı nasazlıq hallarının aradan qaldırılması mərhələli şəkildə aparılır: "Təmir proesisinin gücləndirilməsi ilə əlaqədar çox ətraflı işlər görülür. Qatarda hər bir maşında olduğu kimi tez-tez xarab olan detallar var. 113 belə detal var. O 113 detaldan artıq 108-ni biz özümüz Metropolitendə istehsal edirik. Qalan 5 detal üçün isə son hazırlıq işləri görülür. Belə nümunələri çox göstərmək olar".
Elə qatar ola bilməz ki...
B. Məmmədov diqqətə çatdırıb ki, əvvəlki illərdə qatarların stansiyalarda və tunellərdə hərəkət zamanı dayanmasının səbəbi onların təmir müddəti ilə bağlı olub: "Bakı Metropolitenində qatarlar texniki baxışdan keçirilir, cari təmir – orta təmir, əsaslı təmir və modernləşdirmə - olunur. Bu təmir qaydalarına riayət olunması ən optimal səviyyəyə çatdırılıb. Metropolitendə hazırda xəttdə elə qatar ola bilməz ki, onun təmir müddəti ötsün. Qatar təmir müddəti çatan kimi mütləq təmirə dayandırılır. Artıq sistem nizamlanıb".
Qatarları əvvəl Moskvada təmir edirdik, indi isə...
Mətbuat xidmətinin rəhbəri qeyd edib ki, "Bakı Metropoliteni" qatarları əsaslı təmir edərək modernləşdirməyə başlayıb: "Əvvəl qatarları müəyyən qaçış məsafəsindən sonra Moskvada əsaslı təmir edirdik. Ardından bunu son illər Moskvanın Elektrik Qatarlarının Təmiri Zavodunun Tbilisidəki filialında həyata keçirdik. Gömrüyə, qatarın nəqlinə, orada təmirə çəkilən xərclər artıq avtomatik aradan qaldırılıb. Üstəlik bunu yerli şəraitdə və istədiyimiz kimi edirik, keyfiyyət də daha yüksəkdir. Həmin qatarlarda nasazlıq problemindən əlavə, sərnişinlərin rahatlığı və təhlükəsizliyi ilə bağlı çox işlər görülür".
Bu problemi yerli mütəxəssislərimiz aradan qaldırıb
O xatırladıb ki, daha əvvəllər metro stansiyalarında dayanan qatarların altında gurultu səsləri eşidilirdi: "İndi isə sərnişinlər əksər qatarlarda bunu eşitməyəcək. Bu problem yerli mütəxəssislərimiz tərəfindən aradan qaldırılıb. Təbii ki, detallar xaricdən alınır. Azərbaycanda metro ilə bağlı istehsal sahəsi demək olar ki, sıfır səviyyədədir. Bu da təbiidir, çünki ölkədə vaqonqayırma sənayesi yoxdur. Qatarların əsaslı təmiri demək olar ki, onun bütün sisteminin yenilənməsi deməkdir, ən əsası isə onu modernləşdiririk. 17-dən çox yenilik tətbiq olunub. Qatar faktiki olaraq kompüterləşdirilir. Əgər mütəxəssislər Metropoliteni tərk edirsə, bunlar necə həyata keçirilir?
Yeni kadrlar cəlb etmək üçün ali təhsil ocaqları ilə əməkdaşlıq
B. Məmmədovun sözlərinə görə, "Bakı Metropoliteni" yeni kadrları cəlb etmək üçün ali təhsil müəssisələri ilə əməkdaşlıq edir: "Bakı Metropoliteni bu sahədə Azərbaycan Texniki Universiteti, Azərbaycan Dövlət Neft və Sənaye Universiteti, Azərbaycan-Fransız Universiteti ilə müqavilə bağlayıb. 4-5 ali təhsil ocağı ilə müqaviləmiz var. Dövlət Dəmir Yolu Liseyi ilə də əlaqələrimiz mövcuddur. Üstəlik 2014-cü ildən Bakı Metropoliteninin Təlim-Tədris Mərkəzi fəaliyyət göstərir. İldən-ilə həmin mərkəzin imkanları da genişlənir. Orada yaxın zamanlarda tamamilə fərqli tədris siteminə başlanılacaq".
Məftun Salmanov
Sonxeber.az Telegramda izləyin instagramda izləyin
Şikayətiniz varsa Whatsapp: 051 7028255
Facebookda Paylaş