Sağ ikən "öldürülən" MƏŞHURLARIMIZIN SİYAHISI — Xəbərdən 4 gün sonra ÖLƏN DƏ VAR

Ara-sıra mətbuat məşhur simaların ölüm xəbəri ilə çalxalanır. Adi şayiə böyük səs-küyə səbəb olaraq, "ölən" insanın yaxınları, sevənləri üçün böyük bir narahatlığa səbəb olur. Bəzən isə mətbuat məsələnin əslin öyrənmədən, "qara xəbəri" manşetlə tirajlayaraq, daha ciddi fəsadlara yol da aça bilir. Eynən, bu gün Xalq artisti, cazmen Cavan Zeynallının yayılan ölüm xəbəri kimi...

Səhər gözümüzü açar-açmaz bu ölüm xəbərini eşidib, məyus olduq. Hətta Zeynallının pərəstişkarları, onun sosial şəbəkə hesablarına başsağlığı şərhləri yazmağa başlayıb. Bir sıra məşhur insanlar isə cazmenin fotosunu paylaşaraq ona, Allahdan rəhmət belə diləyiblər.

Sonradan Cavan Zeynallı "dirilərək" sağ olduğunu, səhhətində isə heç bir problem olmadığını açıqlayıb.

Sözsüz ki, bu cür xəbərlərin yayılması nə ilkdir, nə də son olacaq.

Bəzi sənətçilərin dəfələrlə ölüm xəbəri yayılıb, sonradan onlar da "dirilib". Bəzilərinə isə sanki insanların istəyi ilə ölüm tələsərək, əbədiyyata qovuşdurub.

"Ölkə.Az" olaraq, bu məşhurların siyahısını təqdim edirik.

2017-ci ilin avqust ayında sosial şəbəkələrdə müğənni Nazim Pişyarinin dostları onun ölüm xəbərini yaymışdı. Sonradan bu xəbərin şayiə olduğu məlum olmuşdu.

Qeyd edək ki, həmin ərəfədə müğənni ağır xəstəlikdən əziyyət çəkirdi.

Məşhur reper Anar Nağılbazın hələ sağ ikən bir neçə dəfə ölüm xəbəri yayılıb. Sonradan bu xəbərlər təsdiqini tapmasa da, o, 4 avqust 2018-ci ildə həyatla əbədi olaraq vidalaşıb.

Ekstravaqant müğənni Samir Bağırov da tez-tez ölüm xəbəri yayılan məşhurlardandır. Buna səbəb isə onun uzun illərdir səhnədən uzaq qalması, insanlarla ünsiyyətdən qaçdığı göstərilə bilər.

2018-ci ilin aprel ayında sosial şəbəkələr Xalq artisti Könül Xasıyevanın ölüm xəbəri ilə çalxalandı. O zamanlar sənətçi uzun müddət idi ki, sağlamlığında problemlər yaşayırdı. Daha sonra isə xalq artistinin özünün yox, xalasının vəfat etdiyi məlum olmuşdu.

2018-ci ilin iyun ayında sosial şəbəkələrdə Almaniyada müalicəyə yollanmış aparıcı Hacı Nuranın ölüm xəbəri yayılmışdı. Qeyd edək ki, teleaparıcı uzun müddətdir ki, xərçəng xəstəliyindən əziyyət çəkir.

Əməkdar artist, "Bu şəhərdə" komandasının üzvü Coşqun Rəhimov da "ölüb –dirilən" məşhurlardandır. 2017-ci ilin noyabr ayında sosial şəbəkələrdə onun öldüyü bildirilmişdi.

2017-ci il aprel ayında meyxanaçı Kərimin xəstəxanada ağır vəziyyətdə olması, onun ölüm xəbərinin yayılmasına səbəb olmuşdu. Qeyd edək ki, sənətçi beyninə qan sızması nəticəsində komaya düşmüşdü.

2016-cı ilin oktyabr ayında əməkdar artist Kübra Əliyevanın ölüm xəbəri yayılmışdı.

Xalq şairi Musa Yaqubun 2019 cu il iyulun 4-də vəfat etməsi ilə bağlı həm sosial şəbəkələrdə, həm də bir sıra mətbuat orqanlarında məlumat yayılıb. Şairin yaxın dostu, həmkarı Sabir Rüstəmxanlı məlumatı təkzib edərək bildirib ki, xəbərlər həqiqəti əks etdirmir.

2010 – cu ildə reper Hüseyn Dərya hələ sağ ikən "öldürülən" məşhurların qoşulmuşdu. Xəbəri reperin özü "Hələ, sağam" sözləri ilə təkzib etmişdi. Uzun müddət narkotikdən istifadə etməsi, bu şayiənin yayımasına şərait yaratmışdı

Qeyd edək ki, Hüseyn 2014-cü il mart ayınınn 15-də avto qəzaya düşərək həlak olub.

2015-ci ilin sentyabr ayında sosial şəbəkələrdə xalq artisti, kaman ustası Habil Əliyev dünyasını dəyişməsilə bağlı məlumatlar yayılıb. Sənətçinin ürək çatışmamazlığından əziyyət çəkməsi və bu səbəbdən də komaya düşməsi bu xəbərin yayılmasına səbəb olmuşdu. Qeyd edək ki, Habil Əliyev xəbərin yayılmasından 4 gün sonra, 8 sentyabrda vəfat edib.

Xalq artisti, mərhum sənətkar Yaşar Nurinin haqqında nə az, nə çox düz 4 dəfə ölüm xəbəri yayılmışdı. O zamanlar qaraciyər serrozundan əziyyət çəkən aktyor həyatının 4 ilini xəstəxanada keçirmişdi. Bu vəziyyətdə hər dəfə onun ölüm xəbərinin yayılmasına gətirib çıxarırdı. 2012-ci il 22 noyabrda Yaşar Nurinin yayılan ölüm xəbərinin doğruluğu isə, uzun müddət sevənlərini məyus edir.

2017-ci ilin noyabr ayında sosial şəbəkələrdə müğənni Əli Mirəliyevin ölüm xəbəri yayılır. Sənətçi özü bu haqda belə deyir:

"Deyirlər ki, rəhmətə getmişəm. Bəzi saytlar pul qazanmaq üçün ayda 1 dəfə məni öldürür. Mən öyrəncəliyəm onların işinə, gah deyirlər öldü, gah deyirlər maşın vurdu. Ömrü verən və alan Allahdır. Özü bilən məsləhətdir. Atamın yanında qəbrimi qazıblar, hazır qoymuşam. Demişəm ki, xərcə düşməsinlər. Əzrail gələndə sorğu-sualsız aparır. Qorxuram ki, bir gün öləndə heç kim inanmaya".

Müğənni, əməkdar artist Baloğlan Əşrəfov da bir dəfə "ölüb- dirilənlərdəndir".

O zamanlar saytlarından biri onun ölüm xəbərini yaysa da, sonradan məlumatı təkzib etmişdi.

Müğənni açıqlamasında, bu xəbəri yayanları qınamışdı.

"Belə olmaz axı! Başı batsın o xəbəri yazanın. Bu insan kimdirsə düşmənçiliklə yayır bu xəbəri. Təxribatdır mənə qarşı. Başqa nə ola bilər ki? Əzizlərim, doğmalarım eşidib narahat olurlar".

Gəlin, əsası olmadan insanları təşvişə salmayaq. Onsuz bir gün yaranan, bir gün gedəcək. Ölümü tələsdirməyin....

Telegramda izləyin

instagramda izləyin