Valideynlərin DİQQƏTİNƏ! - Uşaqları məktəbə necə adaptasiya etməli?
İlk dərs günündə ağlayan, valideynindən ayrılmaq istəməyən uşaqlara hamımız rast gəlmişik. Artıq məktəbə sayılı günlər qalıb. Bu o deməkdir ki, balacalar məktəbə tam hazır olmalıdır. Təkcə geyim, məktəb ləvazimatları deyil, eyni zamanda uşaqların psixoloji olaraq da məktəbə hazırlığı əsas məsələlərdən biridir. Burada əsas vəzifə valideynlərin üzərinə düşür. Uzun müddət valideynləri ilə birgə olan uşaqlar məktəb nizam – intizamına əməl etməli olurlar və təbii ki, müəyyən çətinliklərlə qarşılaşırlar.
Mövzu ilə bağlı Sonxeber.az- a danışan "Narınc" Uşaq Psixologiya Mərkəzinin rəhbəri, klinik psixoloq Narınc Rüstəmova bildirib ki, uşaqların məktəbə gec adaptasiya olunmasının ən əsası səbəbi uşaqların tək qalmaqdan qorxmasıdır:"Uşaqlar onları məktəbə gətirən valideyninin bir daha geri qayıtmayacağını düşünür. Buna görə də, məktəbə başlamadan əvvəl uşaq mütləq emosional olaraq hazırlanmalıdır. Bu müddətdə evdən ən çox sevdiyi oyuncaq və ya əşyasını yanında götürməsinə icazə verilməsi uşağın narahatlıqlarını azaldır və özünü güvəndə hiss etməsinə kömək olur".
Psixoloq valideynlərə məktəb ləvazimatları alarkən övladları ilə birgə getmələrini, məktəbin onların həyatında hansı dəyişiklər edəcəyini uşaqlarına izah etmələrini zəruri sayır: "Bu dövr ərzində öz məktəb illərindən danışmaları vacibdir".
Psixoloq deyir ki, çox zaman valideynlər məktəblə bağlı uşaqları qorxudurlar: "Uşaqlara deyirlər ki, məktəb gəlir, artıq tez yatmalısız, daha bu oyuncaqlar olmayacaq.Onlar da fikirləşir ki, məktəb necə də dəhşətli bir yerdir. Məktəb gəldi, mən oyuncaqlarımdan uzaq düşdüm. Lakin bu doğru üsul deyil. Uşağın öz əyləncə saatı olmalıdır. Azyaşlılar hər gün eyni saatda yatıb, durmalıdır. Məsələn, uşaq hansısa tətildədir deyə daha çox yuxusuz qala bilməz. Onun dəqiq yuxu saatı tənzimlənməlidir. Çünki yuxu uşaq sağlamlığında əhəmiyyətli yerlərdən birini tutur. Məlumdur ki, uşaqlarda yuxusuzluq nə qədər aqressivlik yaradır".
Psixoloqun sözlərinə görə, məktəbə adaptasiyada çətinlik çəkən uşaqlarda adətən bu əlamətlər müəyyən olunur: "Onlar adətən məktəbə getməmək üçün bəhanələr axtarır, xəstə olmadığı halda özlərini halsız kimi göstərirlər. İştahsız və aqresssiv olurlar. Heç bir səbəb olmadığı halda ağlayırlar. Uşaqların məktəbə adaptasiyasında məktəbin psixoloqu və ibtidai sinif müəllimi də məşğul olmalıdır.Məktəblə bağlı narahatlıqları olan uşaq sakit və həssas şəkildə dinlənilməli və mühakimə olunmamalıdır. Yaxşı olar ki, belə uşaqlara müəllim daha çox diqqət ayırsın.Dərsi əyləncəli formada keçirməyə üstünlük versin. Məktəbə adaptasiya 4 həftə sonra bütün tətbiq olunan metodlara baxmayaraq uğurla bitməyibsə, bir həkim və ya mütəxəssisdən dəstək alınması faydalı olacaqdır".
Sonxeber.az Telegramda izləyin instagramda izləyin
Şikayətiniz varsa Whatsapp: 051 7028255
Facebookda Paylaş