Balakəndə ölümə səbəb olan sürücünün məhkəməsi başlayır

Balakəndə bir nəfərin ölümü, 3 nəfərin xəsarət alması ilə nəticələnən yol-nəqliyyat hadisəsi törətməkdə təqsirləndirilən Azər Qandayevin cinayət işi üzrə ibtidai istintaq başa çatıb.

Sonxeber.az-ın "Report"a istinadən xəbərinə görə, cinayət işi baxılması üçün Balakən Rayon Məhkəməsinə göndərilib.

Hakim Hümbət Səlimovun icraatında olan iş üzrə hazırlıq iclası noyabrın 6-na təyin edilib.

Qeyd edək ki, hadisə bu ilin iyun ayında Balakən-Qazma avtomobil yolunda baş verib. Bedağar kənd sakini, 1985-ci il təvəllüdlü Azər Əlihacı oğlu Qandayevin idarə etdiyi minik avtomobili Qazma kənd sakini Yusif Hacıyevin idarə etdiyi minik avtomobili ilə toqquşub.

Qəza zamanı A.Qandayev, digər sürücü Yusif Hacıyevin anası, 1964-cü il təvəllüdlü Əmanət Qurban qızı Hacıyeva, gəlinləri, 1993-cü il təvəllüdlü Türkanə Sultan qızı Hacıyeva xəsarət alaraq xəstəxanaya yerləşdiriliblər.

Ə.Hacıyeva əməliyyat edildikdən bir qədər sonra xəstəxananın Reanimasiya şöbəsində vəfat edib.

A.Qandayevə Cinayət Məcəlləsinin 263.2-ci (yol hərəkəti və nəqliyyat vasitələrinin istismarı qaydalarını pozma ehtiyatsızlıqdan zərərçəkmiş şəxsin ölümünə səbəb olduqda) maddəsi ilə ittiham verilib.

Telegramda izləyin

instagramda izləyin