"Ulu Öndər Heydər Əliyev çalışırdı ki, Azərbaycan xalqının istəklərinə uyğun Konstitusiya qəbul edilsin" - Azər Həsrət
Bu gün Azərbaycan Respublikasının əsas qanununun - Konstitusiyanın qəbul edildiyi gündür. Dövlətimizin Konstitusiyası 12 noyabr 1995-ci ildə ümumxalq referendumu vasitəsilə qəbul edilib. Bu, Azərbaycanın müstəqilliyini bərpa etməsindən sonra ilk Konstitusiyası idi.Belə ki, 1994-cü ildə Prezident Heydər Əliyevin sədrliyi ilə Konstitusiya komissiyası fəaliyyətə başladı və layihə 1995-ci ildə ümumxalq müzakirəsinə verildi. 1995-ci il noyabrın 12-də ümumxalq referendumu ilə Azərbaycan Respublikasının ilk Konstitusiyası qəbul olundu. Azərbaycanın yeni Konstitusiyası 5 bölmədən, 12 fəsildən və 158 maddədən ibarətdir.Konstitusiyaya 24 avqust 2002-ci ildə, 18 mart 2009-cu ildə və 26 sentyabr 2016-cı ildə referendum yolu ilə əlavə və dəyişikliklər edilib.1996-cı il fevralın 6-da Prezident Heydər Əliyevin sərəncamı ilə noyabrın 12-si Konstitusiya Günü elan edilib.
Bununla bağlı Sonxeber.az-a danışan siyasi şərhçi Azər Həsrət, 1995-ci ildə Azərbaycan Respublikasının ilk Konstitusiyasının qəbul edilməsi ilə bağlı xatirələrini bölüşdü: "Biz də o prosesdə iştirak etmişik. Ulu Öndər Heydər Əliyev konstitusiya layihəsini xalqın müzakirəsinə vermişdi. Bu məsələləri ayrı-ayrı təşkilatlar və fəallar müzakirə edib, öz təkliflərini Konstitusiya komissiyasına göndərirdilər. Biz də o proseslərdə iştirak edirdik. Yaddımdadır ki, Azərbaycan cəmiyyətində canlanma var idi. Vətəndaşlarımız müstəqil Azərbaycan dövlətinin ilk Konstitusiyasının qəbul edilməsində fəal iştirak edirdilər. Ulu Öndər Heydər Əliyev dövlət rəhbəri olaraq çalışırdı ki, Azərbaycan xalqının maraq və istəklərinə uyğun Konstitusiya qəbul edilsin. Nəticə etibarı ilə 1995-ci ilin noyabrın 12-də ilk Konstitusiya referendum yolu ilə qəbul edildi. Sonra zamanla referendum yolu ilə bu Konstitusiyaya dəyişikliklər edildi. Ümumilikdə götürəndə çox yaxşı və mükəmməl Konstitusiyamız var. İnsan hüquq və azadlıqlarına geniş yer verilib. Yəni, Azərbaycan dövlətinin özünün seçdiyi hüquq azadlıqları bu Konstitusiyada tədbiq edilib. Ona görə də dünya Konstitusiyaları arasında Azərbaycan Respublikasının Konstitusiyası özünün mütərəqqi və insanların azadlıqlarına xidmət edən xüsusiyyətinə görə seçilir. Əlbəttə, mən də Azərbaycan vətəndaşı olaraq sevinirəm ki, bu prosesdə iştirak edib, vətəndaş mövqeyi sərgiləmişəm. Bu gün də məhz o Konstitusiyanın tanıdığı hüquqlar çərçivəsində bir dövlətin vətəndaşıyam".
Aysel Yusifqızı
Sonxeber.az Telegramda izləyin instagramda izləyin
Şikayətiniz varsa Whatsapp: 051 7028255
Facebookda Paylaş