"Qarakənd faciəsi Azərbaycan tarixində ən faciləli hadisələrdən biridir"- Millət vəkili

Bu gün Azərbaycan tarixinin ən faciəli hadisələrindən biri – Qarakənddə törədilən qətliamdan 28 il ötür. Xocavənd rayonunun Qarakənd kəndi üzərində "Mİ-8" vertolyotunun vurulması nəticəsində Azərbaycanın bir çox dövlət xadimləri və jurnalistlər həlak olublar. Həlak olanlar arasında dövlət katibi Tofiq İsmayılov, Baş prokuror İsmət Qayıbov, dövlət müşaviri, Daxili İşlər naziri general Məhəmməd Əsədov, millət vəkilləri Vaqif Cəfərov, Vəli Məmmədov, Baş nazirin müavini Zülfü Hacıyev, Prezident Aparatının şöbə müdiri, jurnalist Osman Mirzəyev, Qazaxıstan daxili işlər nazirinin müavini Sanlal Serikov, Azərbaycan Dövlət Televiziyasının jurnalisti Alı Mustafayev də var. Ümumilikdə qəza nəticəsində 22 nəfər həlak olub. Həlak olanlar sırasında vertolyotda Rusiya və Qazaxıstandan olan müşahidəçilər də vardı. Hadisədən 28 il keçməsinə baxmayaraq, indiyədək terror aktının üstü tam açılmayıb və ermənilərin azərbaycanlılara qarşı həyata keçirdiyi digər soyqırımlar kimi, bu cinayəti törədənlər də cəzasız qalıblar.

Bununla bağlı Sonxeber.az-a danışan deputat Nəsib Məhəməliyev bildirib ki, 1991-ci il noyabr ayının 20- də Xocavənd rayonunun Qarakənd kəndi yaxınlığında "Mİ-8" hərbi helikopterin erməni separatçıları tərəfindən vurulması, müstəqil Azərbaycan tarixində ən faciləli hadisələrdən hesab olunur: "Oktyabr ayının 18- də, yenicə dövlət müstəqilliyini bərpa etmiş gənc ölkə üçün ali siyasi rəhbərlikdə təmsil olunan insanların bir helikopterdə vurulması, vurulandan sonra bir müddət xalqdan mahiyyətinin gizlədilməsi, qara qutunun Moskvaya göndərilməsi təbii olaraq Ermənistan kimi düşmənlə mübarizədə arxadan vurulan bir zərbə idi və o dövrdə, cəmiyyətdə çox böyük şok effekti yaratmışdı.Qarakənd faciəsi Azərbaycan tarixində qara ləkədir. Biz və gələcək nəsillər belə faciələrdən düzgün nəticə çıxarmalı, hər zaman, hər yerdə erməni terrorizminin dünya xalqlarına çatdırılması, bir daha təkrarlanmaması üçün əlimizdən gələni etməliyik. Qarakənddə həlak olmuş dəyərli dövlət və ictimai xadimlərimizə, torpaqlarımızın azadlığı uğrunda vuruşmuş şəhidlərimizə Allah rəhmət eləsin".

Telegramda izləyin

instagramda izləyin