Röyanı səhnəyə gətirən aktyor keçindi : "Son dəqiqəyə qədər..." - FOTO

"Neçə gündür vəziyyəti ağır idi. Nəfəs alması çətinləşmişdi. Ona görə də, beyninə oksigen çatmırdı".

Bu fikirləri primetime.az-a açıqlamasında Sərvər Şahbəylinin həyat yoldaşı Fidan Quliyeva deyib. "Bu gün səhər keçindi. Dostları son dəqiqəyə qədər başının üzərində oldular. Daha danışa bilmirdi. Doğma vətənində, Ağsuda torpağa tapşıracayıq. Artıq rayona gətirmişik." Xatırladaq ki, Sərvər Şahbəyli 1962-ci ildə Ağsu şəhərində anadan olub. 1984-ci ildə Bakıda Azərbaycan Dövlət İncəsənət İnstitutunun Dram və kino aktyorluğu fakültəsinə daxil olub. 1987-ci ildə 3-cü kursda oxuyarkən, Bakı Meydan Teatrında aktyor kimi fəaliyyət göstərib. 1988-ci ildə institutu bitirib Dövlət Filarmoniyasında aparıcı-artist (konfransye) vəzifəsində çalışıb. 1989-cu ildə Dövlət Gənclər teatrının yaranmasında yaxından iştirak edib. 2005-ci ilə qədər müəyyən fasilələrlə həmin teatrda fəaliyyət göstərib.1991-ci ildə İstiqlal teatrının da yaranmasında yaxından iştirak etmiş, həmin teatrda bir il fəaliyyət göstərib. Orta məktəb illərindən poeziyaya-ədəbiyyata maraq göstərib, elə o illərdə Ağsu "Birlik" qəzetində şeirləri çap olunub. 1987-ci ildən şeirlərinə yazılan mahnılar efirdə səslənməyə başlayıb. Şeirləri bir neçə almanaxda çap olunub, 2006-cı ildə isə "Bu yol hara gedir belə? kitabı çapdan çıxıb. 2014-cü ildə kitabın eyni adlı audio versiyası öz ifası ilə dinləyicilərə təqdim olunub. Allah rəhmət eləsin!

Qeyd edək ki, S.Şahbəyli əməkdar artist Röyanın müəllimi olub. Röyanı ilk dəfə səhnəyə o gətirib.

Telegramda izləyin