Sağlamlığını itirən şəxslərə verilən müavinətlər 350 manata çatdırılır? - AÇIQLAMA

Sosial müavinətlər qanunla müəyyən edilmiş qaydada ayrı-ayrı kateqoriya şəxslərə sosial yardım göstərilməsi məqsədilə ödənilir. Təbii ki, kateqoriyalar üzrəsosial müavinətlər və onların məbləği müxtəlifdir. Bu gün ən çox verilən suallardan biri sağlamlıq üçün verilən sosial müavinətlərin artırılmasıdır. Qeyd edilən qruplar üzrə sosial müavinətin 350 manata qədər çatdırılması mümkündür?

Mövzu ilə bağlı Sonxeber.az- a danışan iqtisadçı ekspert Rəşad Həsənov deyib ki, büdcə prosesinin hazırlanması zamanı təhlillər göstərirdi ki, 2024-cü ildə sosial müavinətlərin artırılması ilə bağlı qərar qəbul olunacaq və sərəncamlar təsdiq ediləcək6

"Amma ilin 3 ayı keçib. Artıq bu istiqamətdə hələlik bir addım atılmayıb. Məsələ ondadır ki, sosial müavinətlərin məbləği artırılmalıdır. Çünki, keçən il rəsmi inflyasiya 9 faiz ətrafında oldu. Bu da kifayət qədər böyük bir göstəricidir. Müvafiq müavinətlərin indeksləşdirilməsi vacibdir ki, sosial qruplar yoxsullaşmasın. Onların alıcılıq gücü hazırda əvvəlki illə müqayisədə 10 faizə yaxın azalıb. Amma istər sağlamlığa görə yaxud digər sosial müavinətlərin məbləğləri fərqlidir. Əlbəttə ki, nə vaxtsa ən aşağı sosial müavinətin həcmi belə 350 manata çatacaqdır. Bu davamlı bir prosesdir. Manatın alıcılıq gücü zəifləyir və inflyasiya riskləri yaranır. Sosial müdafiənin gücləndirilməsi çərçivəsində bəzən qərarlar qəbul olunur. Amma ən yuxarı sözügedən sosial qruplara daxil olan birinci qrup əlil olan şəxslərə münasibətdə 270 manat məbləğin 350 manata çatdırılması ehtimalını bu il, indiki şərtlər daxilində az görürəm. İndeksləşdirmə olsa, ən yaxşı halda 10 faiz ətrafında ola bilər. Belə olan təqdirdə müvafiq məbləğ ancaq 300 manata çatar. Digər aşağı məbləğlərin artımı isə indiki halda mümkün deyil. Onlar böyük ehtimalla uzunmüddətli dövr tələb edir".

Xatırladaq ki, sağlamlıq üzrə sosial müavinət məbləğləri hazırda belədir: Orqanizmin funksiyalarının 81-100 faiz pozulmasına görə əlilliyi müəyyən edilmiş şəxslərə - 270 AZN, 61-80 faiz pozulmasına görə əlilliyi müəyyən edilmiş şəxslərə – 220 AZN, 31-60 faiz pozulmasına görə əlilliyi müəyyən edilmiş şəxslərə– 150 AZN-dir.

Sevda Səfərova

Telegramda izləyin

instagramda izləyin