Tramp Azərbaycana qarşı "907-ci düzəliş"i ləğv edəcəkmi?
"ABŞ-ın yeni prezidenti Donald Tramp ədalətli mövqe tutub, bu məsələyə düzgün qiymət verərsə, "907-ci düzəliş"in ləğvi mümkün ola bilər".
Bunu Milli Məclisin Dağlıq Qarabağ bölgəsindən seçilmiş deputatı, Xocalının keçmiş icra başçısı Elman Məmmədov bildirib.
Deputat deyib ki, Donald Trampın prezidentliyi hələ yenidi:
"Təbii ki, Azərbaycan tərəfi "907-ci düzəliş" sənədinin ləğvi məsələsini ən yüksək səviyyədə Tramp Administrasiyası qarşısında da qaldıracaq. Çalışacağıq ki, biz buna nail olaq. Ancaq bütün bunlar daha çox Donald Tramp və komandasının bu məsələyə münasibətindən asılıdır".
E.Məmmədov qeyd edib ki, "907-ci düzəliş" sənədi Azərbaycana qarşı çox ədalətsiz qərar olub:
"Ermənilər Azərbaycan ərazilərini işğal edib, bizə qarşı soyqırımları törədib, ancaq əvəzində cəzanı biz almışıq. Belə bir haqsızlıq və ədalətsizlik dünyada görünməmiş haldır".
Qarabağlı deputat bildirib ki, Donald Trampın dünya siyasətinə hansı təsirlərinin olacağı hələlik bəlli deyil:
"Bu gün Donald Tramp dünya siyasəti və ölkələri üçün hələlik kəsilməmiş qarpızdır. Yəni onun hansı siyasəti yürüdəcəyi hələ dünya ölkələrinə dəqiq məlum deyil. Hansı siyasətə üstünlük verəcək, hansı ölkələrlə isti, hansı ölkələrlə isə soyuq münasibətlər quracaq, nə dərəcədə ədalətli qərarlar qəbul edəcək, bunu heç kəs indidən dəqiq deyə bilməz".
Azərbaycanın keçmiş xarici işlər naziri Tofiq Zülfüqarov isə bildirib ki, Trampın prezidentliyi dövründə Azərbaycan-ABŞ əlaqələri daha çox inkişaf edə bilər.
Keçmiş nazir deyib ki, bu barədə ümidli olmaq üçün bəzi əsaslar var:
"Bilirsiz ki, Donald Trampın yəhudi lobbisi ilə sıx əlaqələri mövcuddur. Azərbaycanın da yəhudi lobbisi ilə ənənəvi yaxşı münasibətləri vardır.
Eyni zamanda Tramp Administrasiyasının enerji kampaniyalarına marağı böyükdür. Bu amillər ABŞ-Azərbaycan münasibətlərinin inkişafı üçün töhfə ola bilər".
T.Zülfüqarov Donald Trampın prezidentliyi dövründə "907-ci düzəliş" sənədinin ləğvinin mümkünlüyü məsələsinə də toxunub:
"İndiki mərhələdə Donald Trampın xarici siyasəti barədə konkret nə isə söyləmək bir qədər çətindir. Bir neçə aydan sonra onun xarici siyasətinin istiqamətləri müəyyən olacaq. Buna görə də Trampın xarici siyasətinin formalaşmasını gözləmək lazımdır. Ancaq indi "907-ci düzəliş" sənədi o qədər də aktual deyil. Çünki bu sənədin Azərbaycana qarşı olan mənfi məqamları aradan qaldırılıb. Hazırda "907-ci düzəliş" formal olaraq mövcuddur. Bu məsələnin aktuallığından irəli gələn addım olmalıdır".
Xatırladaq ki, "907-ci düzəliş" 1992-ci ildə erməni lobbisinin təşəbbüsü ilə ABŞ Konqresi tərəfindən "Azadlığa Dəstək" Aktına qəbul edilən və Azərbaycana Amerikanın birbaşa dövlət yardımını yasaqlayan sənəddir.
Düzəliş ilk dəfə 1992-ci ildə Azərbaycan tərəfindən Dağlıq Qarabağın "işğalı" və Ermənistana qarşı blokadasını dayandırmaq məqsədilə ermənipərəst senator Con Makkeyn tərəfindən təklif edilsə də, ancaq daha sonra naməlum səbəblərə görə geri qaytarılıb.
Bundan sonra, yenidən, Senator Con Kerrinin və erməni lobbi təşkilatlarının dəstəyi ilə konqressmen Ueyn Ouens tərəfindən Konqresdə irəli sürülüb.
Senator Riçard Luqar düzəlişin qəbul edilməsinin əleyhinə çıxış edib. Buna baxmayaraq, düzəliş, erməni lobbi təşkilatlarının güclü təzyiqi nəticəsində Konqres tərəfindən qəbul edilib.
ABŞ vitse-prezidenti Cozef Bayden düzəlişin qəbulunda fəal rol oynamış və dəfələrlə onun ləğv edilməsinə qarşı çıxış edib.
2001-ci il 11 sentyabr hadisələrindən sonra Azərbaycanın beynəlxalq terrorizmlə mübarizədə dəstəyini təmin etmək məqsədilə ABŞ Konqresi Prezidentə düzəlişin hüquqi qüvvəsini dayandırmaq səlahiyyəti verib.
Mənbə: publika.az
Sonxeber.az Telegramda izləyin instagramda izləyin
Şikayətiniz varsa Whatsapp: 051 7028255
Facebookda Paylaş