Milli Kitabxanada nə baş verir? – maaşlar gecikir, nahar fasiləsi isə...

Redaksiyamıza Azərbaycan Milli Kitabxanasında (keçmiş M.F.Axundov Kitabxanası) işçilərlə rəhbərlik arasında baş verən narazılıqla bağlı məlumat daxil olub. A24.Az-a adının açıqlanmasını istəməyən əməkdaş bildirib ki, bu gün kitabxanada qurumun işçiləri ilə rəhbərlik iclas keçirib və bir sıra narazılıq yaradan qərarlar işçilərə çatdırılıb.

"İclasda əməkdaşlara bildirdilər ki, yanvar ayının maaşları gecikdiriləcək. Bundan başqa, işçilərin nahar fasiləsi də 1 saatdan yarım saata endirilir. Bundan sonra nahar fasilələri 1 saat deyil, yarım saat olacaq. Təbii ki, bu da işçilər tərəfindən müəyyən narazılıqlara səbəb oldu. Qanunvericilikdə işçilərin nahar fasiləsi 1 saat nəzərdə tutulub. Kitaxana rəhbərliyi isə bu addımı ilə qanunvericiliyin tələblərini pozur".

Sonxeber.az bildirir ki, məsələ ilə bağlı A24.Az-a açıqlama verən Azərbaycan Milli Kitabxanasının elmi katibi Əminə Cəfərova bildirdi ki, işçilərin iddiaları əsassızdır:

"Azərbaycan Milli Kitabxanasında maaşlar hər ay vaxtı-vaxtında verilir. Maaş gecikməsindən söhbət belə gedə bilməz. Bu günkü iclasda işçilərə bu barədə heç bir məlumat verilməyib. Bu ay da, maaşlar zamanında veriləcək. Ancaq işçilərə nahar fasiləsi ilə bağlı xəbərdarlıq edilib. Buna səbəb isə onların qanunla yarım saat nəzərdə tutulan nahar fasiləsini 1 saat dəyərləndirmələri idi. Halbuki, yenə deyirəm onların əmək kitabçalarında nahar fasilələri yarım saat nəzərdə tutulub, 1 saat yox. Əməkdaşlar isə nahardan 1 saata qayıdırdılar, sui-istifadə edilirdi. Bununla bağlı onlara xəbərdarlıq edildi. Bundan sonra 12:30-dan 13:00-a qədər nahar fasiləsi olacaq".

Telegramda izləyin

instagramda izləyin