Lavrova erməni deyən Vaqif Aydınoğlu: "Sözümün arxasında dururam"

ATV-nin Xəbərlər Departamentinin baş redaktoru Vaqif Aydınoğlu haqqında yazılan xəbərlərə münasibət bildirib
V.Aydınoğlu qeyd edib ki, Rusiyanın və bu ölkənin xarici işlər naziri Sergey Lavrovun Qarabağ məsələsinə dair mövqeyini kəskin tənqid edən süjetdən sonra təzyiqə məruz qalması barədə xəbərlər həqiqəti əks etdirmir.
"Mənə qarşı heç bir təzyiq yoxdur. Nə etmişik ki, təzyiq də olsun? "Həftə sonu" müəllif proqramıdır və orada hansı fikirləri səsləndirmişəmsə, arxasında dayanıram. Bu bizim əvvəlcə vətəndaş, sonra isə peşə borcumuzdur. Azərbaycanın milli maraqlarına uzanan dilə qarşı fikirlərimizi bildirmişik və dediyim kimi, bu, bizim əvvəlcə vətəndaş, sonra isə peşə borcumuzdur".

Mətbuatda gedən xəbərlərdə V.Aydınoğlunun sözügedən süjetdən sonra təzyiqə məruz qaldığı qeyd edilirdi.

Xatırladaq ki, ATV-də yayımlanan "Həftə sonu" verilişində Rusiyanın Xarici işlər naziri Sergey Lavrov kəskin tənqid edilib.

"İmperiya nostaljisi, imperialist bəyanat" adlanan süjetdə Rusiya haqda tənqidi fikirlər səslənib. Qeyd olunub ki, Lavrov özünü Rusiyanın deyil, Ermənistanın xarici işlər naziri kimi aparıb və o bu cür sərsəm bəyanat verməli deyildi.

Eyni zamanda telekanal azərbaycanlı jurnalistin də sualının haqlı və məntiqli olduğunu vurğulayıb.

Süjetdə həmçinin Azərbaycanın Xarici İşlər Nazirliyinin cavabı da birmənalı qarşılanmayıb. Aparıcı Vaqif Aydınoğlu qeyd edib ki, XİN-in Rusiyaya verdiyi cavab cavabdan çox, reaksiyaya oxşayıb.

Mənbə: ölkə.az

Telegramda izləyin

instagramda izləyin