"Düşmən itki verib, postları qoyub qaçıblar, nəzarət bizimkilərin..." hərbi ekspert

ATƏT və Beynəlxalq Qızıl Xaç Komitəsinin (BQXK) nümayəndələrinin vasitəçiliyi ilə fevralın 26-da saat 12.00-da döyüş meydanında qalan əsgərlərimizin nəşlərinin çıxarılması planlaşdırılmışdı.

Meyitlərin çıxarılması proseduru başlayanda Ermənistan beynəlxalq vasitəçilərin iştirakı ilə əvvəlcədən əldə edilmiş şərtləri pozaraq əməliyyatın keçirilməsinə mane olmaq məqsədilə bilərəkdən qəbuledilməz yeni tələblər irəli sürüb. Bundan əlavə, cəbhənin digər istiqamətlərində düşmən tərəfi mövqelərimizi müxtəlif çaplı silahlardan, artilleriya qurğularından atəşə tutub və bir neçə istiqamətdə planlı surətdə diversiya həyata keçirməyə cəhd göstərib.

Cəbhədə son günlər ermənilərin törətdiyi təxribatlar, Müdafiə Nazirliyinin mətbuat xidmətinin susması barədə hərbi ekspert Üzeyir Cəfərov ölkə.az-a danışıb:

"3 gündür ki, Beynəlxalq Qızıl Xaç təşkilatı, ATƏT sədrinin şəxsi nümayəndəsi, Müdafiə Nazirliyi ilə bərabər Ermənistan tərəfi ilə danışıqlar aparır. Çox təəssüflər olsun ki, Ermənistan tərəfi həmişə olduğu kimi özünü tərbiyyəsiz və ədəbsiz aparıb. ATƏT-in yayımladığı bəyanatdan da görünür ki, həm ermənilər, həm də Azərbaycan tərəfi neytral ərazidən meyitləri çıxarmalı idi. Prosesi ermənilər bilərəkdən yubadır. Çalışırlar ki, beynəlxalq qurumlar erməni mövqeyindən çıxış etsinlər. Beynəlxalq qurumların mövqeyinin sırf ermənipərəst olduğunu görürük.

Əslində orada heç bir neytral sözü işlədilməməlidir. Azərbaycanın işğal olunmuş ərazilərində ermənilərin nəzarətində olan və Azərbaycan qoşunlarının nəzarət etdiyi ərazinin arasında hərbi qulluqçularımızın meyitləri var. Pusqu qurulan postda bizim hərbi qulluqçularımız üzərlərinə düşən vəzifəni yerinə yetiriblər. Əgər hərbi qulluqçularımızdan biri ermənilərin nəzarət etdiyi ərazidə olsa idi, ermənilər indi dünyanı dağıdardılar.

Bu məsələdə narahatedici əsas məsələlərdən biri Müdafiə Nazirliyinin mətbuat xidmətinin çeviklik və operativlik göstərməməsidir. Ermənilər bütün mümkün variantlardan istifadə edirlər. Sayt, bloq və sosial şəbəkələrdən istifadə edərək haqlı olduğumuz halda dünyaya car çəkirlər ki, guya Azərbaycan hücuma keçib. Azərbaycan hücuma keçsəydi, hansısa texnikalardan istifadə olunardı. Aprel hadisələri zamanı xüsusi təyinatlıları ermənilərin mühasirəsindən çıxarmaq üçün helikopterlərdən, artilleriyadan istifadə etdik. İndi isə düşmənin atəş nöqtəsi susdurulub, düşmən itki verib, postları qoyub qaçıblar. Bizim silahlı qüvvələrimiz isə həmin ərazilərə yaxından nəzarət edirlər. Düşmən tərəfi isə bununla razılaşa bilmir.

Ermənilər artıq beynəlxaq qurumlara da imkan vermirlər və onlara da atəş açırlar. Bu onun göstəricisidir ki, ermənilər beynəlxalq qurumları ciddi qəbul etmirlər. Bu proses belə davam etsə, vəziyyət bir qədər də qəlizləşəcək. Əslində ermənilər çalışmalıdırlar ki, baş verən hadisə sakitliklə həll olunsun. Görünən odur ki, mart, aprel ayı daha gərgin keçəcək. Mümkündür ki, qoşunların lokal xarakterli toqquşması baş verəcək".

Qeyd edək ki, fevralın 24-dən 25-nə keçən gecə Ermənistan silahlı qüvvələrinin bütün cəbhə boyu törətdiyi irimiqyaslı təxribatların qarşısını alarkən şəhid olmuş hərbi qulluqçularımız Abdullayev Aqşin İsmayıl oğlu, Nəzərov Şahlar Yaşar oğlu, Haşımlı Tural Əbdül oğlu, Qədimov Zülfü Rəhim oğlu və Cəfərov Zakir Nazim oğlu şəhid olub.

Telegramda izləyin

instagramda izləyin