Son dəqiqə! "Ermənistan hücum etsə, Azərbaycan…"
Ermənistan prezidenti Serj Sarkisyan çıxışı zamanı "Azərbaycan tərəfi belə ciddi şəkildə hücumlara davam edərsə və vəziyyəti genişmiqyaslı müharibəyə gətirib çıxararsa, biz Qarabağı qorumaq üçün sonuna qədər mübarizə aparacaq və əlimizdə olan silah arsenalının hamısından istifadə edəcəyik" deyib.
Erməni politoloq Levon Şirinyan prezident S.Sarkisyanın fikrini şərh edərkən bildirib ki, Ermənistanın Azərbaycana qarşı iki istiqamətdə hücum planı ola bilər:
"Azərbaycana qarşı hücumlar Yevlax və Sabirabad rayonları istiqamətində təşkil edilə bilər. Rabitə xətlərini kəsmək üçün Yevlax tərəfindən zərbə endirilə bilər, Sabirabaddan hücum olsa, ordan talışları ayağa qaldırıb çaxnaşma yarada bilərik".
Beynəlxalq Hüquq Assosiyasının üzvü, publisist Denis Dvornikovun sözlərinə görə isə S.Sarkisyan aprel hadisələrinin bir də təkrarlanmasına icazə verməyəcək:
"Sarkisyan aprel hadislərinin yaşanmasına imkan verməyəcək. Prezidentin borcudur ki, əsgərlərini və orada yaşayan vətəndaşlarını qorusun".
Azərbaycana qarşı səsləndirilən bu fikirlərini politoloq Zərdüşt Əlizadə şərh edib.
Politoloqun fikrincə Ermənistan rəhbərliyi belə fərziyyələrlə xalqın başını aldatmağa çalşır:
"Ermənistan əhalisi cahil və nadandır. Onları artıq 30 ildir aldadırlar. Bu səsləndirilən fikirlər yalnız fərziyyələrdir və bunların da heç bir əsası yoxdur. Sadəcə seçki ərəfəsində (apreldə parlament seçkiləri olacaq) Sarkisyan bilir ki, onun rəhbərlik etdiyi partiya qalib gələcək. O vaxta qədər də heç bir müharibə olmayacaq. Düşürəm ki, nə Ermənistan, nə də Azərbaycan hakimiyyəti Moskvanın razılığı və göstərişi olmadan heç bir müharibəyə başlaya bilməz. Başlanılarsa, bu onların döyülməsi ilə nəticələnə bilər. Ona görə də yalnız və yalnız Moskvanın əmrlərini mütləq şəkildə həyata keçirirlər".
Siyasi şərhçini fikrincə, görünür bu Şirinyan "cənabları" heç orduda qulluq etməyib və heç coğrafiyadan da xəbəri yoxdur:
"Əvvəla, Ermənistanın Qarabağdakı ordusunun Sabirabad istiqamətdə hücum etməyə halı və gücü yoxdur. Onlar Azərbaycan ərazisinə irəlilədikcə, cinahlardan zərbə alıb, mühasirəyə düşüb, məhv edilmə təhlükəsi ilə qarşılaşacaqlar. Bundan başqa, onlara kim deyir ki, Sabirabada hücum edəndə talışlar ayağa qalxacaqlar? Əksinə, talış əsgərləri, zabitləri Azərbaycan ordusunda qulluq edirlər. İgid kimi 1-ci Qarabağ müharibəsində döyüşüblər. 2-ci Qarabağ müharibəsində də döyüşüb, erməni qəsbkarlarına lazımi cavabı verəcəklər. Yevlaxa zərbə endirilməsinə gəlincə, yenə də deyirəm o ordunun hücum etmək gücü yoxdur. Hücum edən ordu 1:2 nisbətində üstünlüyə malik olmalıdır. Bizdə isə 1:1 nisbətində ordular dayanıb".
"Bəli, onların orda "İsgəndər" raketləri var. Başlığına partlayıcı maddələr yüklənmiş "İsgəndər" raketləri. Onların 8 "İsgəndər" raketi var. 1 "İsgəndər" raketi partlayanda 25 metrlik bir dəlik yaranır. 8 belə dəlik yarandığını götürsək, bu, Ermənistanla Azərbaycan arasında hərbi qüvvə müvazinəti nisbətini dəyişəcəkmi? Əgər onların bu zərbəsi "Bakı-Tbilisi-Ceyhan" neft kəmərinə zərər vursa, bununla qərbin iqtisadi maraqlarına da ciddi zərbə vurmuş olacaqlar. Bu isə o deməkdir ki, həmin qərb "qapaz"ı Ermənistanın başına dərhal dəyəcək. Onların ağrısı nədir ki, qərbin iqtisadi maraqlarına bu cür təcavüz etsinlər. Azərbaycanın bir o qədər vecinə deyil, ona görə ki, bu kəmərlə gedən neft bizim deyil, BP əməliyyat şirkətinindir. O nefti dünya bazarına neft şirkətləri daşıyır. Əgər Ermənistan tərəfi onların mənafeyinə toxunmağa cəsarət etsə, onsuz da onların beynəlxalq vəziyyəti bir az da ağırlaşacaqdır, hazırda da ağırdır. Bu seçki ərəfəsində xalqa nağıllar danışırlar, deməyə sözləri yoxdur. Rusiyanın əlaltısı olan Ermənistan rəhbərliyi onların icazəsi olmadan müharibəyə başlamayacaqlar", – deyə Z.Əlizadə əlavə edib.
Mənbə: A24.az
Sonxeber.az Telegramda izləyin instagramda izləyin
Şikayətiniz varsa Whatsapp: 051 7028255
Facebookda Paylaş