"Qulağına sırğa taxan, qırmızı ayaqqabı geyən adam Lənkəranski ola bilməz"

Xəbər verdiyimiz kimi, Azərbaycan kriminal avtoritet Rövşən Lənkəranski haqda "Sən ona oxşamayasan" adlı film çəkilir.

Bu xəbər sosial şəbəkələrdə böyük rezonansla qarşılanıb. Bəziləri bu addımı təqdir etsə də, bu filmi qınayanlar da çox olub.

Filmin rejissoru Rza Rzayev azxeber.com-a açıqlamasında deyib ki, onun məqsədi Rövşən Lənkəranskini təbliğ etmək yox, bir azərbaycanlının sürətlə məşhurlaşmasını və hörmət qazanmasını göstərməkdir: "Mən kriminal dünyanı və ya Rövşəni təbliğ etmirəm, bir azərbaycanlının qazandığı hörməti və sevgini göstərmək istəyirəm. Bizdə insanlar çox vaxt ilk addıma aldanır, məsələnin təfərrüatlarını bilmədən fikir söyləyir. Fakt odur ki, Rövşən xalq tərəfindən sevilən və hörmət bəslənən şəxs olub, mənim özümün də ona simpatiyası olub. Bir rejissor kimi qərara gəldim ki, onun həyatını özündə əks etdirən "Sən ona oxşamayasan" filmini çəkim, ilkin reaksiyalardan deyə bilərəm ki, bu uğurlu addımdır və hər gün yüzlərlə insan bu filmdə çəkilmək istədiyini mənə yazır"

Rejissor Rövşən Lənkəranski rolunu kimin canlandıracağını da söyləyib: "Mənə hər gün insanlar yazır ki, mənim filan qohumum Rövşənə oxşayır, onu çək. Ancaq mən deməliyəm ki, bu filmdə Rövşəni canlandıracaq şəxs tam fərqli biri olmalıdır, məsələn "Xaş atası"nın qəhrəmanı heç bir filmdə çəkilmədi, çünki filmdə möhür vurmaq önəmlidir. Məsələn: Qulağına sırğa taxan, qırmızı ayaqqabı geyən, cəmiyyətdə özünü səviyyəsiz aparan adam heç vaxt Rövşən rolunu oynaya bilməz. Bundan başqa bu gün Rövşən rolunu oynayan şəxs sabah gedib hansısa verilişdə atlanıb-düşsə, onu heç kim ciddi qəbul etməyəcək. Bu baxımdan da yenə də deyirəm ki, mənə filmdə xarici görünüşcə yox, daxili və xarakter baxımdan Rövşənə bənzəyən aktyor lazım olacaq."

Rza Rzayev filmin nəyə görə milli qəhrəmanlarımız, şəhidlərimiz haqda yox, Rövşən haqda çəkilməsində münasibət bildirib: "Mənim bundan öncəki "Geyilməmiş ayaqqabılar" filmin aprel şəhidlərinə həsr edilib. Görürəm yazırlar ki, guya mən kimdənsə pul almışam, bu filmi çəkirəm. Bu sözləri deyən adamlarla görüşüb, onları başa saldım. Mənim milli qəhrəmanlarla bağlı film çəkmək də planım var və bunu da reallaşdıracam. Filmin nə olduğunu bilməyən insanlar, məni ittiham edəndə, əsəbiləşirəm".

Telegramda izləyin

instagramda izləyin