"Çovdarov qayıtması üçün üzr istəməlidir" - Zaur Axundov

Azərbaycan Futzal Federasiyasının prezidenti Zaur Axundov jurnalistlərə müsahibə verib.

Axundov Prosport.Az saytının da suallarını cavablandırıb. O millidən kənar qalan oyunçu Ramiz Çovdarovun məsələsinə də toxunub:

"Səbəblərini yəqin ki daha dəqiq mən sizə deyə bilərəm. Mən neçə ildir ki, federasiya rəhbəriyəm və həmişə demişəm ki, nəticədən də vacib olan nizam-intizamdır. Şəxsən Ramiz Çovdarovu milliyə mən dəvət etmişəm. Adlarını açıqlamayacağam, ancaq elə məşqçilər var idi ki, onun komandaya gəlməsini istəmirdilər. Onu "Araz"a da mən dəvət etmişəm, klub rəhbərinə onun cəlb olunmasını demişdim. Tino Peres, Miltinyo və Biro Jadenin vaxtında mən onun yığmada oynamasını istəmişəm. Amma bu insan dəfələrlə komanda daxilində nizam-intizamı pozub. Bizim oyunlara 2 həftə qalmış baş məşqçinin müraciəti əsasında onu komandadan xaric etmişik. Halbuki bizim ona ehtiyacımız var. O, yaxşı futzalçıdır, perspektivli, bacarıqlıdır. Ancaq əsas məsələ nizam-intizamdır. O birinci dəfə deyil bunu pozur. Biz heç kimin üstündən xətt çəkmirik. Özümüzünküdür, azərbaycanlıdır, millimizdə oynayıb. Ancaq şəxsən onunla dəfələrlə danışmışam və demişəm ki, nizam-intizam komandada qorunmalıdır. Baş məşqçi nə deyirsə, odur. Onun 1 sözünü oyunçular 2 edə bilməz. Seçmə mərhələdə oynamamağı bəlkə ona dərs olar. Gələcəkdə səhvlərini başa düşsə, təbii ki, milliyə qayıdacaq.

O Çovdarovun milliyə qayıtması üçün üzr istəməli olduğunu söyləyib: "Özü yaxşı bilir ki, kimin qabağında nizam-intizamı pozub. O, bütün komandanın qarşısında üzr istəmələdir. Şəxsən mən federasiya prezidenti kimi istəyirəm ki, o, millidə oynasın. Amma hər şey yenə özündən asılıdır".

Telegramda izləyin

instagramda izləyin