Qənirə Paşayevadan VİDEOAÇIQLAMA: "Tovuzdan olan imkanlı adamlara müraciət edirəm"

Milli Məclisin deputatı Qənirə Paşayeva futbol üzrə Azərbaycan I divizionunun çempionu "Turan Tovuz"u təbrik edib.

Xanım millət vəkili "Qafqazinfo"ya açıqlamasında komandanın Topaz Premyer Liqasına qayıdışına sevindiyini və bu dönüşün möhtəşəm olacağını bildirib.

O, həmçinin Tovuzun futbol ənənələrindən də danışıb: "Turan" köklü klublardan biridir. Hamı Tovuzda futbola marağın nə dərəcədə olduğunu bilir. Bu rayonun köklü futbol ənənələri var. Düşünürdülər ki, komandanın uğurlu günləri bitdi. Amma əksini sübut etdilər. Komandanın Premyer Liqaya qayıdışı əlamətdar hadisədir. Ümid edirəm ki, aidiyyatı qurumlar klubun əsas çempionatda çıxışına kömək edəcəklər. Mən də bunun üçün əlimdən gələn nə varsa, onu yerinə yetirəcəm. Hazırki vəziyyətdə "Turan"ın Azərbaycan çempionatında oynaması üçün heç bir maneə yoxdur. Tək problem maddi məsələdir. Buna görə də mən və klub rəhbərliyi istər ölkə daxilində, istər sərhədlərimizdən kənarda yaşayan imkanlı şəxslərə səslənmişik. Əgər mümkünsə, kömək olsunlar və komanda Topaz Premyer Liqasında da çıxışını davam etdirsin. Mən klub rəhbəri Oqtay Abdullayevlə də görüşdüm. Danışığımız oldu ki, biz komandaya kömək edəcək tovuzlu şəxslərə müraciət edək. Əvvəlcə Tovuzdan olan imkanlı adamlara müraciət edirəm. Tovuzlu olmayanlar da yardım etmək istəsə, qapılar üzünə açıqdır".

Millət vəkili Tovuzlu məhşur iş adamı İlham Rəhimovun klubu himayəsinə götürəcəyi ilə bağlı yazılan xəbərlərə də şərh verib: "Onunla bizim heç bir danışığımız olmaylb. Amma klub rəhbərliyinin İlham Rəhimova müraciət edib-etmədiyindən xəbərsizəm. Bu barədə heç bir məlumatım yoxdur. Mən ümumi olaraq imkanlı şəxslərə səslənmişəm. Klubun uğuru üçün hamımız kömək etməliyik".

Telegramda izləyin

instagramda izləyin