Vəssalam! Manatın bahalaşması ilə bağlı bütün müəmmalı suallara cavab

Azərbaycanda son dövrdə depozit hərracları üzrə məbləğ azalıb. Belə ki, Mərkəzi Bank aprel ayının 12-də keçirdiyi not hərracında məbləği əvvəlki hərraclardan 2 dəfə azaldaraq 25 milyon manata qədər endirib. Bundan əlavə və bu gün keçirilən depozit hərracında məbləğ 50 milyon manat azaldılaraq 150 milyon manat təşkil edib. Fins.az-ın məlumatına görə, iqtisadçı-ekspertlər bildirirlər ki, depozit hərraclarına çıxarılan manat kütləsinin azalması prosesi depozit faizlərinin aşağı düşməsinə səbəb olacaq. Bu da dövriyyədə əlavə manatın qalmasını şərtləndirəcək.

Manat hazırki kursun ətrafında sabilləşə bilər
"AzFinance" İnvestisiya Şirkətinin direktor müavini, iqtisadçı-ekspert İntiqam Səfərəliyev fins.az-a bildirib ki, manatı investisiya etmək istəyən bankların qarşısında əsas iki yol var. Banklar bu vəsaiti ya kredit şəklində verə bilər. Yaxud da əlavə qazanc əldə etmək üçün valyuta bazarına yönləndirə bilərlər. Kreditə yönləndirilməsi iqtisadiyyatın artımına töhvə verə bilər. Valyuta bazarına yönləndirilməsi isə manatın güclənməsinin qarşısını alacaq və hazırkı kursun ətrafında stabil məzənnənin formalaşmasına təsir edəcək. Başqa sözlə, bu manatın məzənnəsinin stabilləşməsinə hesablanmış addımdır.

"Mərkəzi Bankın uçot dərəcəsini azaltmasına işarədir"
Ekspert hesab edir ki, Mərkəzi Bankın depozit hərracının həcminin azaldılması uçot dərəcəsinin azaldılmasına doğru atılan addımların ilk simptomlarıdır. 2017-ci ilin birinci rübünün nəticələrinə əsasən sonra Mərkəzi Bankın hərraclar vasitəsilə topladığı manatın həcmini azaltması bəzi nəticələri ortaya çıxarır. Birincisi, Mərkəzi Bankın birinci rübün nəticəsi barədə toplu məlumatı vardır və bu məlumatlar özündə tədiyyə balansı və iqtisadi artım barədə məlumatları əks etdirir: "Hesab edirik ki, tədiyyə balansı müsbət saldo göstərmiş olmalıdır ki, Mərkəzi Bank dövriyyədə manatın qalmasına doğru addım atmışdır. Bu sərt pul kredit siyasətinin cüzi yumşaldılması addımıdır".
İ.Səfərəliyevin sözlərinə görə, digər tərəfdən Mərkəzi Bank iqtisadi artıma meyl görmüşdür ki, dövrüyyədə manatın həcminin azaldılmasına doğru addım atmışdır.
Eyni zamanda Mərkəzi Bank bu addımı atmaqla manatın kursu üzərindəki təzyiqin nisbətən azaldığını hiss etdiyini düşünürük, yəni artıq kurs üzən məzənnə siyasətində stabillik göstərir, hətta deyərdim manat möhkəmlənir.

"Faizlərin aşağı salınması iqtisadi artıma meyl yarada bilər"
Ekspert əlavə edib ki, depozit hərracı üzrə faizlərin aşağı düşməsi isə bankların alternativ qazanc mənbələri axtarmasına və nəticə olaraq iqtisadiyyatı maliyyələşdirməsinə səbəb olacaq. Bu da öz növbəsində iqtisadi artıma meyl yarada bilər.

Telegramda izləyin