"Neftçi"nin muzeyində Rasim Rəfiyevin adı niyə qeybə çəkilib? - Mərhumun oğlu və klubdan AÇIQLAMALAR

Aprelin 22-də "Bakcell Arena"da "Neftçi"nin 80 illiyi münasibəti ilə fanşopu və muzeyinin açıldığını xəbər vermişdik. Lakin klub rəhbərləri lövhəsində 1995-1997-ci illərdə "Neftçi"yə rəhbərlik etmiş Rasim Rəfiyevin adının olmaması birmənalı qarşılanmayıb.

Sonxeber.az bu mövzunu davam etdirmək qərarına gəlib və mərhum Rasim Rəfiyevin oğlu Riadın fikirlərini öyrənib.

Hazırda AFFA-da əsas millinin administratoru, seleksiya üzrə baş koordinator olan Riad da atasının adının orda olmamasından narazı qalıb: "Atam "Neftçi"nin rəhbəri olduğu müddətdə kluba özündən çox can yandırıb. Klubun muzeyində mən də olmuşam. Bəzi adamlar yaxınlaşıb məndən atamın adının həmin lövhədə niyə olmaması barədə soruşub. Mən isə bunun cavabını bilmirəm. Yaxşı olar ki, bunun cavabını elə "Neftçi" rəsmiləri cavablandırsın. Mənə də onların nə cavab verəcəyi maraqlıdır. İstənilən halda, atamın "Neftçi" üçün bu qədər etdikləri fonunda ondan kiçik bir fraqment də olsa yerləşdirmək olardı. Ancaq bunu da orda görmədim".

Əslində Riad Rəfiyevin narazılığı başadüşüləndir. 1995-1997-ci illərdə "Neftçi"nin əsas sponsoru məhz Rasim Rəfiyevin oğlunun adını daşıyan RİAD şirkəti olub. Əbəs yerə deyil ki, həmin vaxt komandanın formalarının üzərinə bu şirkətin adı yazılıb.

Bəs görəsən, "Neftçi" tərəfi bu məsələyə nə deyir? Bilavasitə bu məsələ ilə məşğul olmuş "Neftçi"nin İnformasiya və İctimaiyyətlə Əlaqələr Departamentinin rəhbəri Mehman Rəsulovdan bu sualımıza aydınlıq gətirməyi xahiş etdik.

Sabiq ANS-çinin cavabı belə oldu: "Onun adının orda olmamasının səbəbi var. Çünki o, "Neftçi"də vitse-prezident vəzifəsində çalışıb. O lövhədən də aydın olduğu kimi, Rasim Rəfiyev "Neftçi"də çalışdığı müddətdə klub prezidenti Aydın İbrahimov olub. Onun da adı həmin lövhəyə klub prezidenti kimi yerləşdirilib. Burda heç bir qaranlıq məqam yoxdur. Rəsmi sənədlərdə Rasim Rəfiyev klub prezidenti olmayıb. Biz rəsmi sənədlərdə kimin adı prezidentdirsə, onun şəklini də ora yerləşdirmişik. Mən bunu özümdən çıxarmamışam. "Neftçi"nin tarixini bilənlərlə məsləhətləşib bunu etmişik. Əgər onun adını ora daxil etsəydik, Aydın İbrahimovun 2 illik prezident postunu itirmiş olacaqdıq. Bizim kluba aid "Neftçi" - 70" kitabı var. Səhv etmirəmsə, o kitabın 496-cı səhifəsində də Rasim Rəfiyevin vitse-prezident olduğu göstərilib. Bu vaxta qədər həmin yazıya etiraz edən olmayıb, indi olur. Yəqin həmin kitabı bu vaxta qədər oxuyan olmayıb".

Bəlli olduğu kimi, bu lövhəyə klub prezidentləri yox, klub rəhbərlərinin adı salınıb (məsələn, Çingiz Abdullayev Müşahidə Şurasının sədri olsa da, klub rəhbəri kimi adı ora daxil edilib - S.M.). Belədə onu da bu siyahıya daxil etmək olardı. Axı kluba sponsorluq edən bir adam vitse-prezident ola bilməzdi...

Rəsulov isə rəsmi sənədlərə söykəndiyini bildirir: "Mən də eşitmişəm ki, rəhmətlik Rasim müəllim "Neftçi" üçün çox şey edib. Klub üçün çoxlu pul xərcləyib. Ancaq rəsmi sənədlərdə vəzifəsi vitse-prezident kimi göstərilən adamı mən ora necə daxil edə bilərəm axı?"

Qeyd edək ki, Rasim Rəfiyevə məxsus RİAD firması aviaşirkət olub və hazırda fəaliyyət göstərmir.

Səbuhi MUSAYEV

Telegramda izləyin

instagramda izləyin