Əməkdar idman xadimi: "İllərlə göstərilən diqqət və qayğını unutmaq və danmaq olmaz"

Əməkdar idman xadimi: "İllərlə göstərilən diqqət və qayğını unutmaq və danmaq olmaz"Son günlər güləşçilərlə federasiya arasında yaşanan maaş qalmaqalı daha da böyüyüb.

Ölkənin gündəm mövzusuna çevrilən bu məsələ haqda Azərbaycanın Əməkdar Bədən Tərbiyəsi və İdman Xadimi, MOK-un üzvü Cavanşir Qurbanov geniş açıqlama verib.

O, son günlər yaşananlardan narahat olduqlarını deyib:

"Son günlər güləş ailəsində baş verən xoşagəlməz olaylar, məni güləşə doğma bir insan olaraq hədsiz dərəcədə narahat etdi. Güləş elə bir idman növüdür ki, çətinliklərə həmişə sinə gərib. İllərlə bu idman növünün quruculuğunda olmuş bir vətəndaş kimi, onu deyə bilərəm ki, müstəqilliyimizin ilk çağlarında maliyyə çətinliklərinə, təlim-məşq toplantılarının olmamasına, maaşların çox az miqdarda verilməsinə, maddi texniki bazanın zəif olmasına, lazımi idman inventarının azlığına baxmayaraq, güləş idman növü - həmişə yüksək və stabil nəticələri ilə fərqlənir və ən əsası Azərbaycanımızın milli idman növü olduğunu dünyaya sübut edib".

Federasiya rəsmisi deyib ki, Azərbaycanda idmana dövlət qayğısı var:

"Bugün biz güclü dövlətik. Azərbaycan Respublikasının Prezidenti, Milli Olimpiya Komitəsinin rəhbəri, cənab İlham Əliyevin idmana xüsusi diqqət və qayğısı var və bu dəstək nümunəsi heç bir digər dövlətlərdə yoxdur. Bu da idmanı, vətəni, bayrağı sevən vətənpərvər idmançı üçün yetərlidir.

Cavanşir Qurbanov idmançıların etirazına da münasibət bildirib və buna görə məşqçi korpusunu qınayıb:

"Çox təəssüf ki, güləş ailəsində baş verən anlaşılmazlıqlar məşqçi korpusunun ideoloji işinin tam peşəkarcasına aparılmamasının nəticəsidir ki, güləşçilər sosial şəbəkələrdə ictimai qınağa çevrilmişdir. Mən bir idman xadimi kimi, illərlə güləşdə zəhməti olan bir Azərbaycan vətəndaşı olaraq, bir ata kimi idmançılarımıza onu tövsiyyə edirəm ki, hər kəs onun üzərinə düşən öz işi ilə məşğul olmalı və qarşıdan gələn Güləş üzrə Dünya Çempionatına məsuliyyətlə hazırlaşaraq ölkəmizə yüksək nəticələrlə qayıtmalıdırlar. Məşqçilərimizə onu tövsiyə edirəm ki, idmançıları diqqətlə dinləyib, növbəti dövr üçün konseptual sənəd hazırlasınlar. Biz bugün Mübariz İbrahimov kimi qəhrəmanlarla öyünürük. Sizi də gənclərimiz bu qəhrəmanlar sırasında qəbul edərək, sizdən nümunə götürürlər. Sizin əməlləriniz gənclərimizə örnək olmalıdır.

Cavanşir Qurbanov mətbuat nümayəndələrinə də müraciət edib:

"Mediadakı dostlarımıza onu tövsiyə edirəm ki, biz həmişə birləşməyi bacaran, çətinliklərdən düzgün çıxış yolu tapa bilən insanlarıq. Vaxtilə Rəsul Çunayevin erməni idmançısına məğlubiyyətini tənqid və təhqirlər deyil, əksinə dəstək olub onu ruhlandıran və yenidən erməni və digər rəqiblərə qalib gəlməsi üçün zəmin yaradan bizim sizlərlə birliyimiz oldu və olacaq.

O idmançıların şəraitindən də danışıb və deyib ki, idmançılara hər cür qayğı göstərilir:

"Onu da xatirladım ki, bugün hər bir yığma üzvü, məşqçilərimiz və hakimlərimiz idmanla yanaşı bu və ya digər sahələrdə işlə təmin olunmaqla yanaşı sosial məişət problemləri öz həllini tapır. Böyük əksəriyyəti isə Dövlət qulluğunda mühüm vəzifələrdə çalışırlar. İllərlə göstərilən diqqət və qayğını unutmaq və danmaq olmaz! Əminliklə deyə bilərəm ki, Gənclər və İdman Nazirliyimiz, Milli Olimpiya Komitəsi, Fedrasiyalar, İdman Cəmiyyətlərinin və klubların birgə fəaliyyəti hələ uzun illər müstəqil Azərbaycanımıza yeni-yeni idmançı adlarını bəxş edəcək, yüksək nəticələrlə ölkə Prezidentinin bu qayğısı müqabilində cavab olaraq xalqımızı qalibiyyət himni ilə sevindirəcək. Sonda isə Sizə bir atalar sözünü xatırladım: "Gözü toxa, ağzındakı yetər, ac gözə dünya yetməz!"

İdman   Baxılıb: 579   Tarix: 31 iyul 2017  
Facebookda Paylaş




DİGƏR MARAQLI XƏBƏRLƏR



vipemlak.az