Azərbaycanda sovet dövrünün abidələrindən ibarət park yaradılsın - TƏKLİF

"Əsas odur ki, biz tarixi olduğu kimi gələcək nəsillərə çatdıraq"

Azərbaycanda sovet dövrünün abidələrindən ibarət parkın yaradılması təklif edilib.

Bunu Milli Məclisin Mədəniyyət Komitəsinin sədri Rafael Hüseynov komitənin bu gün keçirilən iclasında çıxış edərkən deyib.

O bildirib ki, tarixinin müəyyən dövründə Stalinə, Leninə münasibət pis olub, onların abidəsi dağıdılıb:

"Mən vaxtilə Bakıda sovet dövrünün abidələri dağıdılanda bir məsələ təklif etmişdim, o təklif hələ də qüvvədə qalır. O abidələrdən hələ dağıdılmayanları var. Təklif etmişəm ki, o abidələrin hamısını yığsınlar. 11-ci Orduya, 26 Bakı Komissarına həsr olunmuş abidələr də, ayrı-ayrı komissarlara, partiya xadimlərinə hazırlanmış abidələr də dağıdılmasın. Onların hamısı yığılsın, ayrıca park düzəldilsin. Bu da olsun, bizim qəmli, keçmiş tariximiz. Dərslərdə uşaqları aparaq sovet tarixini göstərsinlər. Bildirsinlər ki, bizə 11-cı Ordunun xilaskarımız olduğunu deyiblər, amma bunlar bizim xilaskarımız olmayıb, onlar Azərbaycanı işğal ediblər. Yaxud Azərbaycanın başqa siyasi xadimləri olub ki, o dövrdə onlar qəhrəman sayılıblar, adlarına küçələr verilib. Amma dövr dəyişib. Bu gün qəhrəman saydığımız Cumhuriyyət qurucularının da adları sovet dövründə qadağan edilib. Siyasətləri dəyişməklə ayrı-ayrı insanlara olan münasibətlərin dəyişməsi düzgün deyil. Əsas odur ki, biz tarixi olduğu kimi gələcək nəsillərə çatdıraq".

R.Hüseynov qeyd edib ki, Polşada "Dekommunizasiya haqqında qanun qəbul edilib: "Polşada aprelin 1-də "Dekommunizasiya haqqında" qanun qəbul edilib. Yəni kommunizmin yaşamasını göstərən abidələrin dağıdılması nəzərdə tutulur. Biz o abidələrin dağıdılmasının əleyhinəyik. Rusiyanın Dövlət Duması da buna ayrıca öz etirazını bildirəcək. Bu tarixdir, ona toxunmaq olmaz"./Trend

Telegramda izləyin

instagramda izləyin