"NLT Telekom"-dan fırıldaq: Nağd alınan telefonun kredit borcu çıxdı - ŞİKAYƏT

Vətəndaş "NLT Telekom"dan nağd telefon aldı, lakin telefonun kredit borcu olduğu üçün şəbəkəsi bağlandı.

Sonxeber.az bildirir ki, bu barədə BiG.AZ redaksiyasına şikayət ünvanlayan jurnalist Pərviz Musayev məsələnin araşdırılmasını və ictimailəşməsini xahiş edib. Sözügedən şikayəti oxucularımıza təqdim edirik: "Bu ilin yanvar ayında "NLT Telekom" dükanlar şəbəkəsinin Fəvvarələr Meydanı, 6 ünvanında yerləşən 2 saylı satış mağazasından şəxsi istifadəm üçün 1299 AZN-ə 64 GB tutuma malik "iPhone 6S" smartfonu almışam. 2 gün öncə, oktyabrın 10-da telefonun şəbəkəsində yaranmış problemlərlə əlaqədar Azercell Müştəri Xidmətlərinə müraciət etdim və onlar problemin sırf telefondan qaynaqlandığını bildirdilər. Belədə telefonu aldığım "NLT Telekom 2" dükanına yollandım. Telefonun İMEİ kodu yoxladıqdan sonra dükanın meneceri olan Elçin adlı şəxsdən aldığım cavab məni şoka saldı: "Sizin telefon kredit borcuna görə bloklanıb".

Ona telefonu nağd pulla məhz bu dükandan aldığımı dedikdə isə məsələni bu cür izah etdi - mənim onlardan aldığım smartfon "Azercell" şirkətinin "kampaniya" telefonu olub. (https://www.azercell.com/az/news/show/612/) Yəni hər hansı bir fiziki şəxs Azercell-dən kredit xətti ilə yeni telefon alıb, sonra isə həmin telefonu qutusunu açmadan satıb və "zəncirvari" proseslə bu telefon "NLT Telekom"a gəlib çıxıb və ordan da mənə satılıb. Öz növbəsində "Azercell" şirkəti də həmin telefonun aylıq kreditinin ödənməməsi səbəbindən smartfonu "bloklayıb". Azercell Müştəri Xidmətlərinə bu məsələ ilə bağlı müraciətimə cavab olaraq bildirildi ki, telefon yalnız kredit borcunun bağlanacağı təqdirdə "blok"dan çıxarıla bilər".

Şikayətçi Pərviz Musayev həmçinin onu da qeyd edib ki, şirkətdən zəmanət kartı tələb etsə də ona heç bir zəmanət sənədi təqdim edilməyib: "Telefonu alab zaman nə qədər zəmanət kartı tələb etsəm də mənə zəmanət kartı təqdim edilmədi.

"NTL Telekom 2"nin təmsilçisi Elçin bəyə telefonu məhz onlardan aldığımı əsas gətirməklə yaranmış problemə görə də onların məsuliyyət daşıdığını bildirdim. O isə məni smartfonun Azercell-in "kampaniya telefonu" olduğunu bilmədiyini, onu Rza adlı distribütordan aldığını və bloklanmanın da məhz Azercell tərəfindən həyata keçirildiyinə inandırmağa çalışdı.

Vəziyyətdən çıxış yolu kimi mənə sərf etməyən 3 variant təklif olundu – ya telefonun "plata"sı dükanın hesabına dəyişdirilsin, ya bunun yerinə mənə eyni modeldən olan işlənmiş başqa telefon verilsin, ya da 1299 AZN-ə aldığım telefonu ona 550 AZN-ə satıb üstünə əlavə pul qoymaqla məhz onlardan başqa telefon alım.

Təbii ki, onun bu təkliflərindən imtina edərək mənə dəyən maddi zərərin əsas səbəbkarı kimi məhz "NLT Telekom" məsuliyyət daşıdığını bildirdim və məsələnin hüququ çərçivədə həll olunması üçün aidiyyəti orqanlara müraciət edəcəyimi dedim. Qarşı tərəf isə müxtəlif qeyri-qanuni yollarla onların dükanına gəlib çıxan və müştərilərə satılan problemli telefonlara görə bir daha heç bir məsuliyyət daşımadığını bildirdiyi üçün Daxili İşlər Nazirliyinə və İqtisadiyyat Nazirliyi yanında Antiinhisar Siyasəti və İstehlakçıların Hüquqlarının Müdafiəsi Dövlət Xidmətinə rəsmi şəkildə müraciət ünvanlamaq qərarına gəldim. Ümid edirəm ki, baş vermiş hadisə ilə bağlı ən qısa zamanda lazımi ölçü götürüləcək".

Yaranmış problemlə bağlı "NLT Telekom" şirkəti ilə əlaqə saxlayıb mövqelərini öyrənməyə çalışsaq da zəngimizə kobud şəkildə cavab verilib və suallarımız cavablandırılmayıb.

Telegramda izləyin

instagramda izləyin