Hər kəs bu gün Bakı vaxtı ilə saat 16:30- u gözləyir

Bu gün Bakı vaxtı ilə saat 16:30-da ABŞ-da sentyabr ayı üzrə pərakəndə satış və inflyasiya göstəricisi açıqlanacaq.

İnflyasiyanın səviyyəsindən asılı olaraq, dolların məzənnəsi ilin sonuna qədər öz hərəkət trayektoriyasını müəyyənləşdirəcək. Xatırladaq ki, dünən ABŞ-da istehsal qiymətləri indeksi gözləniləndən artıq olub və 0,4% təşkil edib. Həmçinin, işsizlik müavinəti üçün müraciətlər son 44 ilin minimal səviyyəsinə enib və 243 min nəfər təşkil edib.
Əgər inflyasiya göstəricisi 0,2% proqnozdan artıq olarsa, dollar sürətlə möhkəmlənəcək. Əks halda, dolların ucuzlaşmağa davam edəcəyi və bu prosesin 2018-ci ilin ilk yarısının sonuna qədər davam edəcəyi mümkündür.
"Analitik təhlillər onu deməyə imkan verir ki, istehsal qiymətləri indeksinin artması bugünkü inflyasiya göstəricisinə də müsbət təsir edəcək. ABŞ-da qasırğalar səbəbindən benzin qiymətlərinin artması və saathesabı əmək haqqının yüksəlməsi inflyasiyanın artmasına səbəb olacaq. Əgər inflyasiya göstəricisi proqnozları üstələsə, FED-in dekabrda uçot dərəcəsini artırması dəqiqləşəcək. Bu da öz növbəsində əsas valyuta cütlüyü olan avro/dolların ilin sonuna qədər 1,14 USD/EUR səviyyəsinə kimi geriləməsinə gətirib çıxaracaq", - deyə analitiklər əlavə ediblər.
Qeyd edək ki, hazırda USD/EUR 1,1830 səviyyəsində qərarlaşıb.

Mənbə: report.az

Telegramda izləyin

instagramda izləyin