Həbsdən çıxıb "Yaşa Bakinski" ləqəbli kriminal avtoriteti öldürdü - TƏFƏRRÜAT

Bakıda "Yaşa Bakinski" ləqəbi ilə tanınan Baləhməd Baləhmədovu öldürməkdə təqsirli bilinən Elxan Ağayevin cinayət işi üzrə məhkəmə prosesi keçirilib.
Bu gün Bakı Ağır Cinayətlər Məhkəməsində hakim Mayıl Bayramovun sədrliyi ilə baş tutan prosesdə dövlət ittihamçısı ittiham aktını elan edib.
Elxan Ağayev ibtidai istintaq dövründə cinayət işinin düzgün aparılmadığını deyib. O, hadisəni törətdiyini etiraf edib: "Mənim evimə gəlmişdi, əlində də bıçaq vardı. Məni bıçaqla vurmaq istəyirdi, onu qabaqladım. Cinayəti törədəndən sonra polisə məlumat verdim".
Daha sonra ifadə verən Baləhməd Baləhmədovun qızı Aytən Baləhmədova ifadə verib. O, atasının qatilinin Elxan Ağayev olduğunu deyib. Mərhumun qızı deyib ki, Elxan Ağayev onun atasının evinə gəlib və cinayəti törədib.
Elxan Ağayev isə hadisəni öz evlərində törətdiyini söyləyib.
İttihama görə, hadisə bu il matın 22-də Qaradağ rayonu Lökbatan qəsəbəsində baş verib. Qəsəbə sakini, 41 yaşlı Elxan Ağayev aralarında yaranmış mübahisə zəminində qohumu, 66 yaşlı Baləhməd Baləhmədovu bıçaqla qətlə yetirib.
Cinayəti törətmiş Elxan Ağayev Qaradağ rayon Polis İdarəsinin 10-cu polis bölməsi əməkdaşları tərəfindən saxlanılıb.
Məlum olub ki, Elxan Ağayev əvvəllər Cinayət Məcəlləsinin 234, 126 və 207-ci maddələri ilə məhkumluq həyatı yaşayıb.
Saxlanılan şəxs ifadəsində bildirib ki, 1 ay bundan əvvəl Baləhməd Baləhmədov onu bıçaqlayıb. İndi isə Elxan Ağayev qisas məqsədilə Baləhməd Baləhmədovu öldürüb.
Elxan Ağayev Cinayət Məcəlləsinin 126.3-cü (qəsdən sağlamlığa ağır zərər vurma, zərərçəkmişin ölümünə səbəb olduqda) maddəsi ilə ittiham edilir.
Xatırladaq ki, dünyasını dəyişmiş Baləhməd Baləhmədov 30 ildən yuxarı məhkumluq həyatı yaşayıb və kriminal aləmdə "Yaşa Bakinski" ləqəbi ilə tanınıb.

Mənbə: publika.az

Telegramda izləyin

instagramda izləyin