"Qarabağ"a Kələntər ŞOKU - Stadionu ayağa qaldıran uşaq - VİDEO - FOTO
1960-cı ildə ekran həyatı görən Azərbaycan kinosunun incisi "Yeddi oğul istərəm" sovet hakimiyyəti dövründə inqilabın qələbəsinə sidqi-ürəklə inanan və qələbə naminə canlarından belə keçməyə hazır olan qəhrəman oğullardan bəhs edir.
47 il sonra bu dəfə Avropada Azərbaycan xalqı naminə o missiyanı "Qarabağ" üzərinə götürdü
Qitənin ən nüfuzlu futbol turniri Çempionlar Liqasına tarixində ilk dəfə bir Azərbaycan klubu yüksəldi. "Qarabağ"ın turnirə vəsiqəsi adını daşıdığı ərazi ilə bağlı həqiqətləri dünya ictimaiyyətinə çatdırmaq üçün bu zamana kimi ən unikal təbliğat maşınına çevrildi. Bunu UEFA-nın bəzi ermənipərəst havadarları çox yaxşı anlayırdılar.
Dünən axşam doğma azarkeşlər önündə ÇL-in V turu çərçivəsində İngiltərə nəhəngi "Çelsi"ni qəbul edən "köhlən atlar" potuqaliyalı "Kələntər"in ("Yeddi oğul istərəm" filmi) xain qərarının qurbanı oldu.
İlk dəqiqələrdən inamlı oyunu ilə diqqət çəkən kapitan Rəşad Sadıqova 22 -ci dəqiqədə göstərilən müəmmalı qırmızı kart və penalti qərarı Qurban Qurbanovun planlarının üstündən xətt çəkdi. "Qarabağ" Çempionlar Liqasında ardıcıl 3 matçda "qırmızı"ya düşən yeganə komanda oldu.
Amma...
Matça "Qarabağ"dan sərfəli nəticə və baxımlı oyun arzusu ilə gələn tək mən deyildim. 70 min azarkeş arasında bu matça xüsusi hazırlıq görənlər də az deyildi.
Məğlubiyyət məni heç bu qədər üzmədi
Hakimin oyunu "sındırma" anından sonra azarkeşlərin böyük bir qisminin oyunun sonuna kimi stadionu tərk etdiyi diqqətimdən qaçmadı. Bu məqamda bizə bu həyəcanı yaşatdığına görə hakimin final fitinə qədər komandanın yanında olub, dəstəyini əsirgəməmək əvəzinə meydanı tərk edən "azarkeş"lərə ən böyük dərsi oyunun bitməsinə 6 dəqiqə qalmış təxminən 6-7 yaşlarında olan bir uşaq verdi. Yan sektordan anası ilə "Qarabağ"a dəstək olmaq üçün matça gələn bu uşaq, stadiona çökən sükutu gözyaşları içində ardıcıl, dayanmadan bir neçə dəfə "Qarabağ" deyə qışqıraraq pozdu.
Stadion azyaşlının bu çığırtısına biganə qalmadı və sanki, matç yenidən başlayırmış kimi komandaya dəstək verdi. Final fitindən sonra sözügedən uşağın stadionun pilləkənləri ilə düşərkən hönkür-hönkür ağlaması tüklərimi biz-biz etdi. Yaxınlaşıb ondan ağlamağının səbəbini soruşdum. Anası "Uduzduqları üçün!" cavabını verdi.
Çox sağol, "Qarabağ", sağol ki, Azərbaycana bu həyəcanı yaşatdın!
Sonxeber.az Telegramda izləyin instagramda izləyin
Şikayətiniz varsa Whatsapp: 051 7028255
Facebookda Paylaş