Gələn ildən Azərbaycanda evlərin qiyməti bahalaşacaq? - CAVAB

Nüsrət İbrahimov: "Tikinti materiallarını istehsal edən müəssisələr çətin vəziyyətini yaşayır"

"Valyuta bazarındakı qeyri-müəyyənlik daşınmaz əmlak bazarında alıq-satqı əməliyyatlarına birbaşa mənfi təsiri göstərib. 2015-ci il ilin fevral ayında baş verən birinci devalvasiya fevral ayının sonu və mart ayında əmlak bazarında aktivlik yaratmışdısa, sonrakı aylarda bazar tam aktivliyini itirib. Həmin ilin dekabr ayında baş verən ikinci devalvasiya isə bazara ölümcül zərbə vurub. 2016-cı ilin sonu və 2017-ci ilin əvvəllərində, eləcə də bu ilin sentyabr və oktyabr aylarında bazarda nisbətən aktivlik müşahidə olundu. Desəm ki, hazırda bazarda 2014-ci ilin 3-cü rübünə kimi olan aktivlik bərpa olunub yalan olar. Noyabr ayından isə bazar əvvəlki vəziyyətinə qayıdıb. Sadəcə mövsümü aylarda aktivlik müşahidə olunub".
Bunu daşınmaz əmlak bazarı üzrə ekspert Nüsrət İbrahimov bildirib.
Onun sözlərinə görə, eyni vəziyyət kirayə bazarında da müşahidə olunub: "Kirayə bazarı da devalvasiya nəticəsində daha çox zərbə alan bazarlardan biri olub. Bilirsiniz ki kirayə bazarında aktivlik və qiymət kirayə götürənlərin ödəmə qabiliyyəti ilə birbaşa bağlıdır. Əlbəttə kirayə götürən gəlirlərində itkilərə məruz qalıbsa, o kirayə öhdəliyini icra etməkdə çətinlik çəkir. Bax bu baxımdan kirayə bazarında aktivlik 2015-2016-cı illərdə aşağı düşüb. Yalnız bu ilin avqust-sentyabr-oktyabr aylarında bazarda aktivlik müşahidə edildi. Və bu dövrdə kirayə bazarında 14 faiz qiymət artımı olub. Oktyabr ayının sonundan qiymətlər enməyə meyillidir".

Tikinti materiallarının qiymətlərinin monitorinqini də aparan Nüsrət İbrahimov bildirib ki, bu sahədə vəziyyət tikinti sektorundan asılıdır: "Tikinti sahəsində canlanma olanda tikinti bazarında da aktivlik müşahidə olunur. 2015-2016-cı illərdə tikinti sektorundakı passivlik tikinti materialları bazarına da mənfi təsiri göstərib. Tikinti materialları bazarında daxili məhsulların qiymətində artım müşahidə olunmayıb. İdxal olunan məhsullarda isə qiymət artımı olub. Amma bu artım manatın dəyərinin itirdiyi qədər olmayıb, az artım olub.
2017-ci ildən pilot layihələr işə düşdü. Ölkədə, xüsusən paytaxtda tikintinin həcmində artım müşahidə olundu. Bu da öz növbəsində tikinti materialları bazarına öz təsirini göstərdi. Amma təəssüf ki, ölkədə, xüsusən regionlarda tikinti materiallarını istehsal edən, o cümlədən tikinti kərpici və daşı, sement istehsal edən müəssisələr bu gün hələ ki çətin vəziyyətini yaşayır. İstehsalın həcmində iki dəfə yaxın azalma müşahidə edilir".

Nüsrət İbrahimov bildirib ki, dekabr ayında daşınmaz əmlak bazarında qiymət artımı müşahidə olunacaq: "Çünki adətən yeni il ərəfəsində daşınmaz əmlak bazarında canlanma olur. Bu da qiymətlərin artmasına az da olsa öz təsirini göstərir.

Hesab edirəm ki 2018-ci ildə bu ilə nisbətən əmlak bazarında aktivlik müşahidə olunacaq. Çünki artıq insanlar bu il mövcud duruma alışıblar. İş adamları da mövcud durumdan çıxış yollarını axtarırlar. Hansılar ki çıxış yolunu tapıb onlar biznesini genişləndirmək istiqamətində hərkətdədirlər. Ona görə də 2018-ci ildə bazarda aktivlik 8-10 faiz artacaq, qiymətlər isə 6-8 faiz artacaq. Tikinti seqmentində canlanma iqtisadiyyatın digər sahələrində də canlanmaya səbəb olacaq, daşınmaz əmlak bazarında, kirayə bazarında və tikinti materialları bazarında aktivlik müşahidə olunacaq".

Mənbə: bizimyol.info

Telegramda izləyin

instagramda izləyin