Millət vəkilindən nazirlərin görüşünə ŞƏRH
"Çox arzulayardıq ki, nazirlərin görüşü problemin həlli istiqamətində dönüş nöqtəsinə çevrilərdi və münaqişənin həllinin bundan sonra sürətləndiyini görərdik. Lakin bunu demək çətindir".
Bu sözləri Sonxeber.az-a açıqlamasında Milli Məclisin Müdafiə, təhlükəsizlik və korrupsiya ilə mübarizə komitəsinin sədr müavini, millət vəkili, YAP İcra Katibliyinin Siyasi təhlil və proqnozlaşdırma şöbəsinin müdir Aydın Mirzəzadə bu gün Azərbaycanın xarici işlər naziri Elmar Məmmədyarovla Ermənistanın XİN rəhbəri Edvard Nalbandyan arasında keçiriləcək görüşə münasibət bildirərəkən deyib.
Onun sözlərinə görə, görüşdə prezidentlərin yeni görüşlərinin hazırlanması ilə bağlı məsələlər, ATƏT –in Minsk qrupu həmsədrlərinin təklifləri müzakirə oluna bilər. Adətən belə ağrılı problemin həlli istiqamətində aparılan danışıqların mahiyyəti gizli saxlanılır. Tarixən bu belə olub. Çünki, ortada olan müxtəlif mövqelərin ictimailəşdirilməsi müzakirənin sonrakı gedişinə mane ola bilər. Biz bu məsələnin gizli qalmasına etiraz etmirik. Amma nəticəni tələb edirik:
"Təəssüf ki, Ermənistanın beynəlxalq hüquq normalarını tanıması, Azərbaycanın ərazi bütövlüyünə hörmətlə yanaşılması ilə bağlı tələbimizin nəticəsini görə bilmirik. Azərbaycan bundan böyük əziyyət çəkir, olkənin inkişafına ciddi tədir edir. Lakin elə bir zaman gəlib çatıb ki, zərbə bizdən daha çox Ermənistana təsir edir. Onların əhalisi ölkədən köçür, iqtisadiyyatı çökür, ölkə bu gün izolyasiya səviyyəsinə çatıb. Azərbaycan və Türkiyə kimi iki güclü nüfuzlu dövlətin imkanlarından istifadə edə bilmir. Vaxtilə Azərbaycan Ermənistanla dostluq əlaqələri mövcud olsaydı, Bakı-Tbilisi -Ceyhan neft kəməri, Bakı-Tbilisi-Qars dəmiryolu xətti oradan keçərdi.
Millət vəkili vurğulayıb ki, infrastruktur layihələrinin Ermənistandan keçməsi onların büdcələrinə 100 milyon dollarla vəsait gətirərdi. Azərbaycan Ermənistana ucuz kreditlər verə bilərdi, orada investisiya layihələri həyata keçirə bilərdi. Ölkəmizdə yaşayan erməni icması vətəndaşlarımızın malik olduğu imkanlardan istifadə edə bilərdi. Cənab Prezidentimiz İlham Əliyevin vaxtaşırı regionlara səfərləri yerli televiziyalarda nümayiş etdirilir, reportajlar yayımlanır saytlarda məlumat dərc olunur. Həmin məlumatlarla bizimlə yanaşı işğal olunmuş ərazilərdə yaşayan erməni icmasının üzvləri, erməni vətəndaşları da tanış olur. Onlarda belə bir təsəvvür yaranır, niyə biz azərbaycanlılar kimi yaşamayaq, niyə onlarda olan inkişaf bizdə olmasın?! Səbəbi isə bu gün hakimiyyətdə olan siyasi komandanın Azərbaycan torpaqlarını işğalda saxlamaqla özünün hakimiyyətdə qalmasını uzatmaq istəməsidir Ən əsası isə onun apardığı siyasət erməni millətinin maraqlarına çox ciddi ziyan vurur.
Qeyd edək ki, Bu gün Azərbaycanın xarici işlər naziri Elmar Məmmədyarovla Ermənistanın XİN rəhbəri Edvard Nalbandyan arasında görüş keçiriləcək.
Nazirlərin görüşü Avstriyanın paytaxtı Vyanada baş tutacaq.
Görüşdə Dağlıq Qarabağ münaqişəsinin nizamlanma prosesi müzakirə olunacaq. Nazirlərin görüşünə Minsk qrupunun həmsədrləri də qatılacaq.
Aysel Kərimova
Sonxeber.az Telegramda izləyin instagramda izləyin
Şikayətiniz varsa Whatsapp: 051 7028255
Facebookda Paylaş