Xarici işlər nazirlərinin görüşü prezidentlərin görüşü üçün zəmin hazırlaya bilər - AÇIQLAMA
"Azərbaycan və Ermənistan xarici işlər nazirlərinin Krakovda keçirilən görüşündən ciddi nəticə gözləməyə dəyməz".
Bunu "Xalq Cəbhəsi" qəzetinin baş redaktoru, politoloq Elçin Mirzəbəyli deyib.
Elçin Mirzəbəyli qeyd edib ki, xarici işlər nazirləri hər hansı bir məsələ ilə bağlı yekun qərar vermək, hansısa məqamı prinsipial olaraq razılaşdırmaq səlahiyyətinə malik deyillər. "Onlar yalnız masa üzərində olan, yaxud yeni təqdim olan prinsiplər əsasında informasiya və fikir mübadiləsi apara bilərlər. Xarici işlər nazirlərinin görüşünün yekun nəticəsi prezidentlərin görüşü üçün zəmin hazırlamaq ola bilər ki, burada da son söz sahibi onlar deyillər. Düşünürəm ki, görüş öncəsi səslənən fikirlərə, xüsisilə də Rusiya və Ermənistanın xarici işlər nazirlərinin açıqlamalarına diqqət çəkməklə münaqişənin tənzimlənməsi prosesinin real mənzərəsinə müəyyən aydınlıq gətirmək olar. Ermənistanın xarici işlər naziri görüşə yeni təkliflərlə getdiyini bildirir. Bu isə o anlama gəlir ki, prezidentlərin görüşünün təşkili üçün xarici işlər nazirləri bir, yaxud bir neçə dəfə görüşməli olacaqlar. Çünki təklif varsa, o müzakirə olunmalı və mövqe bildirilməlidir".
Elçin Mirzəbəyli vurğulayıb ki, Sergey Lavrov isə görüşdən öncə danışıqların ancaq mərhələli həll planı müstəvisində aparılacağını bildirmişdi. "Təəssüf ki, Rusiya xarici işlər nazirinin bu bəyanatını bizim bəzi ekspertlərimiz xüsusi şadyanalıqla qarşıladılar. Sanki Lavrov yeni bir fikir səsləndirib. Onsuz da bu günədək masa üzərində olan bütün həll variantlarında münaqişənin mərhələli həlli nəzərdə tutulur. Bu həmin Lavrovdur ki, "Azərbaycanın Dağlıq Qarabağda hərbi əməliyyatlar keçirmək hüquq yoxdur" deməklə, ölkəmizin İşğal altında olan ərazilərimiz üzərindəki suveren hüquqlarını şübhə altına almışdı. Bu "urra", "çəpik" "analitikası"na son qoymaq lazımdır. Yalnız təsəvvürlər yanlış nəticələrə gətirib çıxara bilər".
Elçin Mirzəbəyli onu da bildirib ki, digər tərəfdən, çox ani bir baxışla, Rusiya və Ermənistan xarici işlər nazirlərinin açıqlamaları arasındakı əlaqəni sezmək mümkündür. "Xatırlayırsınızsa, bir müddət öncə Serj Sarkisyan "münaqişənin paket həllindən" söz açmışdı. Əslində şübhə etmirəm ki, Ermənistan prezidenti bu bəyanatı elə Lavrovun göztərişi ilə verib. İndi Lavrov Sarkisyanın mövqeyinə guya əks mövqe sərgiləməklə münaqişənin həllində ölkəsinin ədalətli mövqe tutduğunu sərgiləmək, Kremlin nüfuz müvəkkilləri üçün təbliğat söykəncəyi yaratmaq istəyir. O biri tərəfdən isə Nalbandyana "yeni təkliflər" barədə danışmaq göstərişi verilir ki, danışıqlar prosesinin uzadılması və burada Rusiyanının hər hansı bir rolunun olmadığı barədə görüntü yarada bilsinlər. Mənim gördüyüm real mənzərə budur".
Deputat Asim Mollazadə qeyd edib ki, Ermənistan beynəlxalq təzyiqlərdən sonra danışıq yoluna geri qayıdıb. "Onlar bir müddətdir ki, danışıqlara razlıq vermirdilər. "Amma təzyiqlərdən sonra danışığa getməyə razı oldu. Ermənistan tərəfi özünü elə aparır ki, guya ciddi danışıqlar gedir. Əslində Ermənistan sülhə hazır deyil. İşğalçılıq siyasətinə son qoymaq istəmir. Beynəlxalq ictimaiyyəti aldatmaq üçün bu gün Ermənistan danışıqlarda iştirak edir. Bilirsiniz, ermənilərdən təxribatçı addımlar hər zaman gözləniləndir".
Sonxeber.az Telegramda izləyin instagramda izləyin
Şikayətiniz varsa Whatsapp: 051 7028255
Facebookda Paylaş