"İçki içmirəm, siqaret çəkmirəm, nə intizamsız hərəkətim olub?" - Kamran Ağayev

"Keşlə"nin və Azərbaycan millisinin qapıçısı Kamran Ağayev "Zirə" ilə yoxlama oyunundan (2:1) sonra brifinq keçirib.

Təcrübəli qolkiper jurnalistlərin suallarını cavablandırıb.

- Oyunla bağlı düşüncələriniz necədi? Çox aqressiv görünürdünüz...
- Baş məşqçi nə tapşırıq verirsə, o cür addım atırıq. Əvvəlki yoxlama matçlarında fərqli tapşırıq vermişdi. Bu dəfə isə başqa taktika ilə oynadıq.

- Nəticə nə dərəcədə önəmli idi?
- Əlbəttə, hər bir idmançı qələbəni arzu edir. İnsanda istər-istəməz bu hiss var. Adi öz aramızda futbol oynayanda da qələbəni arzu edirsən, aqressiv olursan. Bu, təbii haldır.

- "Keşlə"də "İnter" adlanan vaxtda çıxış etmisən. Həmin komanda ilə indikini necə müqayisə edərdin?
- Fərq hər zaman olur. Qalxmaq da olar, düşmək də. Hələ ki, nəsə danışmaq tezdir.

- Bu komanda ilə nəyə ümid etmək olar?
- Ümumiyyətlə, adam Azərbaycan çempionatına baxanda üzülür. Ancaq nə qədər üzüləsi olsaq da, doğma vətənimizdi və əlimizdən gələni edirik. İnşallah, çempionata bütün futbolçular hazır olarlar.

- Milli komandamızın Antalyada toplanışı olacaq. Dəvət gözləyirsənmi?
- Milli komanda ilə bağlı heç nə danışmaq istəmirəm. Yığma hamımızındı və qapısı üzümüzə açıqdır. Futbolu bilənlərə qapı açıq olur. Milliyə dəvət alsaq, gedəcəyik. Almasaq yox.

- Baş məşqçi Qurban Qurbanov bildirib ki, futbol biliklərindən daha vacib olan oyunçuların xarakterləridi...
- İndi bu nə deməkdi? Bu sözü mənə aid edirsiniz? Mənə nə aidiyyatı var axı?

- Ölkənin əsas qapıçısı olsan da, haqqında çox söz-söhbətlər gəzir...
- Konkret nədirsə, onu da deyin. Mən də Qurban Qurbanovun həmin müsahibəsini oxumuşdum. Hələ Çexiyada oynayarkən. Sualı ona belə ünvanlamışdılar ki, siz bunu Kamran Ağayevə aid edirsiniz? İçki içmirəm, siqaret çəkmirəm. Başqa nə istəyə bilərsiniz?

- Söhbət içki və siqaretdən getmir. İntizamsız futbolçular çoxdu...
- Axı nə intizamsız hərəkətim olub?

- Söhbət yalnız səndən getmir...
- Qurban Qurbanovun müsahibəsində konkret olaraq mənim adımı çəkiblər. Siz də həmin sualı mənə ünvanlayırsınız. Konkret danışaq. Bu, hamımızın millisidi, tək yalnız və başqasının deyil. Çağırsalar, oynayacağıq. Dəvət gəlməsə də, kənarda dayanacağıq. Üzüləsi nə var ki? Azarkeş yenə milliyə dəstək göstərəcək. Necə ki, futbolda bizi alqışlayırlar, biz də güləşdə və digər idman növlərində idmançılara dəstək göstəririk. İndi də kənardan futbolçularımıza dəstək göstərəcəyik. Üzüləsi heç nə yoxdu. Əsas heyət anlayışı yoxdu. Çalışmaq, peşəkarlıq lazımdı. Bir də qaydalara əməl etmək. İndi bilmirəm ki, siz hansı intizamsızlıqdan danışırsınız. Həyatda olduğu kimi, meydanda da hadisələr olur. Zədələrdən qorunmaq lazımdı. Bir futbolçunun zədələnməsi intizamsızlıq deyil. Qırmızı vərəqə alanda kiməsə yumruq ataraq qovulmaq başqa şeydi. Biri də var komandanın qələbəsi üçün çalışaraq vaxt uzadırsan və cəzalanırsan. Bunlar fərqli anlayışlardı.

- "Mlada Boleslav"a gedişini səhv addım kimi qiymətləndirmirsən?
- Səhv addım deyildi. Sadəcə, artıq çəki ilə getmişdim. Formaya sonradan düşə bildim. Baş məşqçi də bunu açıqlamışdı. Yenidən zədələndim. Azərbaycan futbolu deyil ki, üstündən keçsinlər. Ora Avropadı. Yolumuza davam edəcəyik. "Keşlə"ylə 6 aylıq müqaviləm var.

Telegramda izləyin

instagramda izləyin