Prezident hansı borcların silinməsini təklif edib? - Şərh

Bu çox ciddi qanun layihəsidir, onu sığorta amnistiyası adlandırmaq olar.

"Ölkə başçısının Milli Məclisə göndərdiyi bu layihə sığortanın amnistiyası deməkdir. Bu çox ciddi qanun layihəsidir".

Bu sözləri Sonxeber.az-a açıqlamasında Milli Məclisin İqtisadi siyasət, sənaye və sahibkarlıq komitəsinin üzvü, millət vəkili Vahid Əhmədov Azərbaycan prezidenti İlham Əliyevin Milli Məclisə (MM) əhalinin məcburi dövlət sosial sığorta sahəsində 2006-cı ilin 1 yanvar tarixinə yaranmış və bu ilin aprelin 1-ə qədər ödənilməmiş borclarının, eləcə də 2015-ci ilin 1 yanvar tarixinədək yaranmış maliyyə sanksiyalarının silinməsini təklif etməsini şərh edərkən deyib.

Onun sözlərinə görə, sığorta məbləğləri ilə əlaqədar faiz ödəmələri var idi:

"2015-ci ilin yanvarın 1-dən 2016-cı ilin yanvarın 1-ə qədər olan sığorta ödəmələri ilə bağlı qərar qəbul edilib. Misal üçün 2018-ci il aprelin 1-ə qədər ödəmələrin 10%-i ödəniləcəksə, 90% yaxud 30% ödəniləcəksə 70% sanksiyalar silinəcək. Bu çox ciddi qanun layihəsidir, onu sığorta amnistiyası adlandırmaq olar. Bu gözlənilən qanundur çünki, dövlət sığorta fondlarına borclu təşkilatlar həddən artıq çoxdur. Bu baxımdan sığorta amnistiyasına böyük ehtiyac var idi. Həmin tarixə qədər hansı borclar varsa onlar silinəcək.

Millət vəkili bildirib ki, qanun layihəsi Milli Məclisdə qəbul edildikdən sonra cənab Prezident İlham Əliyev tərəfindən imzalanacaq və qərar qəbul ediləcək. Bu qanunla hüquqi və fiziki şəxslər borclardan azad ediləcək. Onlar sığorta halları ilə əlaqədar ciddi problemlərinin olmamasına çalışacaqlar. Çünki sığorta borcları olanlar hər ay əlavə faiz ödəyirlər. Daha sonra sığorta ilə bağlı məsələlərin icrasına sıfırdan başlanılacaq. Bu sahibkarlar üçün ən əhəmiyyətli prosedurlardan biridir. Çünki, sığorta ödənişləri 22%-dir. Bu sahədə böyük problemlər mövcuddur. Bu qanunun qəbulu daha çox sahibkarların işini asanlaşdıracaq.

Aysel Kərimova

Telegramda izləyin

instagramda izləyin