Rüstəm Əbülfətoğlu Mir Şahinin layihəsindən danışdı: "Böyük zövqlə REAL TV yə baxacam"
Müxtəlif illərdə ANS, Space və Azad Azərbaycan telekanallarında müxbir, teleaparıcı və baş redaktor vəzifələrində çalışıb.
Söhbət tanınmış jurnalist Rüstəm Əbülfətoğlundan gedir.
Hazırda mətbuat sahəsindən uzaqlaşan jurnalist "R&R Şirkətlər Qrupu"- R&R Müstəqil Yayım və Media MMC-nin təsisçisi və baş direktorudur.
Sonxeber.az topxeber.az-a istinadən 11 ildir jurnalistikadan ayrı düşmüş Rüstəm Əbülfətoğlu ilə müsahibəni təqdim edir:
— Rüstəm bəy, bir oxucu olaraq, Azərbaycan mətbuatının hazırkı durumunu necə qiymətləndirirsiniz?
— Əvvəla təşəkkür edirəm, məni yada saldığınız üçün. Mən 11 ildir jurnalistikadan uzaqlaşmışam və daha çox biznes fəaliyyəti ilə məşğulam. Buna baxmayaraq, mətbuatı çalışıram izləyim. Sualınıza gəlincə, Azərbaycan mətbuatının hazırki durumu, fikrimcə birmənalı şəkildə cəmiyyətimizə adekvatdır. Cəmiyyət müxtəlif təsirlər altında milli-mənəvi dəyərlər, əxlaq baxımından nə qədər geriləyirsə, mətbuat da o qədər ciddi xəbərçilikdən uzaqlaşır. Sosial media ciddi mətbuatı da sosiallaşmağa vadar edir. Bundan sonra düşünmürəm ki, bizim vaxtı ilə gördüyümüz ciddi mətbuatı, ciddi xəbərçilik ənənəsini bir də nə zamanda yenidən görmək mümkün olsun. Bu gün barmaqla sayıla biləcək qədər ciddi mətbu orqanlar var ki, onlar da tədricən yoxa çıxır. Qarabağla bağlı danışıqlar, mühüm neft və qaz kontraktları, regional projelərlə bağlı xəbərlərin yerini bayağı və lüt sosial xəbərlər tutur.
— Nə vaxtsa fikrinizi dəyişib, yenidən jurnalistakaya qayıdaya bilərsiniz?
— Həyatda hər şey mümkündür. Lakin hazırda belə bir niyyətim yoxdur. Jurnalistikaya bu günkü yanaşmam ilə daha çox maliyyəçi olaraq qayıda bilərəm, hər hansı bir media təşkilatının maliyyə dayanıqlığını təmin etmək üçün. Bunun üçün onların görmədiyi, lakin onları gözləyən bir çox maddi imkanlar var. Çox qəribədir ki, hələ də bir çox elektron media strukturunun bütün marketing siyasəti yalnız xəbər tıklamalarının sayını saymaqla məhdudlaşır. Və ya bəzi telekanallar süni və müvəqqəti, ani reytinq köpükləndirməsi ilə məşğuldur. Son olaraq isə gəlirlər yalnız tıklamalara hesablanmış ehtimal edilən reklam bazarından əldə olunacaq gəlirlərlə məhdudlaşır. Media hər şeydən əvvəl bir biznes, kommersiya strukturudur, başqa sözlə bir marketdir, hoteldir, hava yolları şirkətidir, taksi şirkətidir, restoran və ya ticarət mərkəzidir. Buna görə daha çox diqqət onun kommersiya baxımından bir neçə il əvvələ hesablanmış strateji yol, gəlir xəritəsinə yönəlməlidir. Yoxsa hər iki gündən bir, hansısa media qurumunun möhtəşəm təbriklərlə dolu açılışı az sonra səssiz, utancverici gedişi ilə müşaiət olunacaq.
— Bakı Dövlət Universitetinin rəhbərliyi tərəfindən pedaqoq kimi çalışmaq təklifi gəlsə, gedərsiniz?
— Bakı Dövlət Universiteti Azərbaycanın hər zaman sayılıb seçilən ali təhsil ocaqlarından biri olub və hər zaman yüksək peşəkarlığı ilə seçilən kadrlarla zəngin olub. Təəssüf ki, gördüyüm işlərin çoxluğu və vaxt məhdudiyyəti baxımından hazırda hər hansı digər fəaliyyətlə məşğul olmaq barədə düşünmürəm. Amma çox böyük məmuniyyətlə tələbələrə jurnalistikanın yalnız üslub, janr, stilistika nə bilim müxbir və ya redaktorluqdan ibarət olmadığını, bu sahənin ilk növbədə biznes maraqları baxımından, xəbərin də daşınmaz əmlak kimi bir sərmayə olduğunu, aktiv və ya passivlərə bölünməsi, passiv xəbərin az sonra gəlir gətirən aktivə çevrilməsinin sirlərindən danışa bilərdim. Onda əminəm onların bu sahəyə marağı yalnız yorucu imtahan nəticələrinə hesablanmış biliklərlə məhdudlaşmazdı. Onlar ilk növbədə özlərini bu sahədə gəlir əldə edəcək media qurumunun idarəedicisi olaraq görə bilərdilər. Yəni yaxşı jurnalist olmaq üçün yalnız oxumaq kifayət etmir, bu həm də Allahın hər kəsə bəxş etmədiyi bir istedad məsələsidir. Amma istənilən sahənin tələbəsində biznes təfəkkürü oyatmaq mümkündür ki, seçdiyi sahənin iqtisadi baxımdan gəlirli olacağına əmin olsun. Çünki ətrafımızda gördüyümüz nə varsa iqtisadi münasibətlərin təzahürüdür.
— Mirşahin Ağayevin yeni layihəsinə münasibətiniz necədir?
Mir Şahin müəllim müasir Azərbaycan jurnalistikasında bir DƏYƏRDİR. Bu gün bu dəyər qorunmalı və qiymətləndirilməlidir. 1996-cı ildəki ilk tanışlığımızdan Mir Şahin Ağayev hər zaman, bütün iclaslarında vətəni, milləti, dövləti sevməyi, xalqın bir parçası olan ölkə vətəndaşının qədrini bilməyi, ona hörmətlə yanaşmağı öyrədirdi. İnanıram ki, hazırda bu sahədə mövcud olan boşluğu REAL TV bir televiziyanın əhatə edə biləcəyi qədər aradan qaldıracaq.
— Hansı Azərbaycan kanallarına baxırsınız?
Hər zaman ANS-ə baxmışam. İndi də hərdən çaşıb deyirəm çevirin ANS-ə xəbərə baxaq. İmkan olduqda ATV-nin, arada AZTV-nin xəbərlərini izləyirəm. Bundan sonra böyük zövqlə REAL TV-yə baxacam.
Sonxeber.az Telegramda izləyin instagramda izləyin
Şikayətiniz varsa Whatsapp: 051 7028255
Facebookda Paylaş