"Xəzər adaları"ndakı son vəziyyətlə bağlı - Hacı İbrahim Nehrəmlidən AÇIQLAMA

Bir müddət əvvəl maliyyə çatışmazlığına görə tikintisi dayandırılmış "Xəzər adaları"ndakı işlər yenidən bərpa olunur. Bu barədə Sonxeber.az-a açıqlama verən tikintini aparan "Avesta" konsernin prezidenti Hacı İbrahim Nehrəmli bildirib ki, may ayının sonlarından etibarən işlər qaldığı yerdən davam etdiriləcək. O, qeyd edib ki, bu dəfə işlər dayandırılmamaq üzrə başlayacaq: "İşlərin sürətlə aparılması və daha çox sərmayənin cəlb olunması üçün yeni investorlarla danışıqlar aparılır. Çin və Cənubi Koreya respublikalarından olan sərmayədarlarla artıq danışıqların son mərhələsindəyik. Bundan başqa meqalayihəyə qoşulmaq üçün müxtəlif şirkətlər var ki, bizdən qarantiya istəyirlər".

Qeyd edək ki "Xəzər Adaları" Xəzər dənizində, Bakıdan 25 km cənubda yerləşən, 41 adadan ibarət, 3000 hektar sahəni əhatə edən süni arxipelaq şəhər olmalıdır. Tikinti işlərinə 2011-ci ilin mart ayında başlanılıb. Layihə "Avesta" şirkətinin təşəbbüsü nəticəsində ortaya çıxıb. Layihənin dəyəri 100 mlrd. dollar təşkil edir. Burada 1 milyon nəfərin yaşaması üçün şəhər salınması planlaşdırılır. Ada şəhərcikdə 150 məktəb, 50 xəstəxana, bir neçə park, ticarət mərkəzləri, mədəniyyət mərkəzləri, institut kampusları, Formula-1 trası və Azerbaijan Tower ( Azərbaycan qülləsi) tikilməlidir (tikilərsə dünyanın ən hündür binası olacaq). Burada eləcə də dünyanın ən böyük məscidinin tikilməsi planlaşdırılır. Bütün bu tikililərin 9 ballıq zəlzələyə davam gətirə biləcəyi söylənilir. Həmçinin 150 körpünün və 1 hava limanının tikilməsi də planlaşdırılır. Layihənin 2020-2025-ci illərdə başa çatması gözlənilir.

E.Murad

Telegramda izləyin

instagramda izləyin