AZAL öz gəlirləri ilə "yaşamalıdır"

Azərbaycan Hava Yolları Şirkətinin özəlləşdirilməsi problemləri həll etməyəcək.

Milli Məclis komitələrinin birgə iclasında 2016-cı ilin dövlət büdcə zərfi ilə bağlı aparılan müzakirələr zamanı deputat Zahid Oruc bəzi dövlət müəssisələrinin özəlləşdirilməsini təklif edib.

Sonxeber.az anspress-ə istinadla bildirir ki, həmin müəssisələrdən biri də "Azərbaycan Hava Yolları" (AZAL) Qapalı Səhmdar Cəmiyyətidir.

Lakin AZAL-ın özəlləşdirilməsi bu şirkətin fəaliyyətindəki problemlərin aradan qaldırılmasına kömək etməyəcək. İqtisadçı Azər Mehdiyevin sözlərinə görə, onun fəaliyyətindəki problemlər dəqiq müəyyənləşdirilməlidir.

"AZAL-ın özəlləşdirilməsi bu problemləri həll etməyəcək. Çünki bu problemlərin kökündə inhisarlaşma durur. Eyni zamanda qiymətlərin yüksək olmasına səbəb Azərbaycanda bu bazarda rəqabət çatışmamazlığıdır", - deyə Azər Mehdiyev bildirib.

Məlumdur ki, əvvəllər Azərbaycanda daha ucuz qiymətə xidmət təklif edən hava yolları şirkətləri var idi. Lakin AZAL müxtəlif bəhanələrlə həmin şirkətləri rəqabətdən uzaqlaşdırıb və insanları alternativ seçimdən məhrum edib. Bu isə bazarda qiymət artımına gətirib çıxarıb.

Problemlərin aradan qaldırılması üçün şirkətlərin rəqabətinə imkan yaradılmalıdır. Bu zaman qiymət artımının qarşısı müəyyən qədər alına bilər.

Bundan başqa, AZAL-a dövlət tərəfindən yardım verilir. İqtisadçı Azər Mehdiyevin sözlərinə görə, bu yardımlar azaldılmalıdır.

"AZAL öz imkanları ilə xidmət keyfiyyətini yaxşılaşdırmağa məcbur edilməlidir. Şirkət öz gəlirləri ilə yaşamağı bacarmalıdır", - deyən ekspert AZAL-ın özəlləşdirilməsi ilə Azərbaycan hava yolları bazarındakı problemlərin həll edilməyəcəyini vurğulayıb.

Telegramda izləyin

instagramda izləyin