"Azərbaycan iqtisadiyyatında azalma olacaq"

"2016-cı ilin dövlət büdcəsinin gəlirləri 14 milyard 566 milyon manat nəzərdə tutulub ki, bu da 2015-ci illə müqayisədə 4 milyard 872 milyon manat az vəsait deməkdir".

Sonxeber.az-ın məlumatına görə, bunu parlamentin beş komitəsinin 2016-cı ilin dövlət büdcəsi zərfinə həsr olunmuş birgə iclasında maliyyə naziri Samir Şərifov deyib. Nazir 2015-ci illə müqayisdə 2016-cı il dövlət büdcəsinin gəlirlərinin və xərclərinin azalmasının səbəblərini dünyada baş verən qlobal proseslər, həmçinin neftin qiymətinin kəskin şəkildə aşağı düşməsi ilə əlaqələndirib. Onun sözlərinə görə, bu baxımdan, 2016-cı ilin dövlət büdcəsində neftin bir barelinin qiyməti 50 dollar həcmində nəzərdə tutulub.

Nazir qeyd edib ki, optimist variant kimi neftin bir barelinin qiyməti 60, pessimist variant kimi isə 40 dollar nəzərdə tutulur.

"Odur ki, 2016-cı ildən 2019-cu ilə kimi Azərbaycan iqtisadiyyatının inkişafında azalma müşahidə olunacaq"- deyə, S.Şərifov sözlərinə əlavə edib.

"2016-cı ildə yaşayış minimunun həddi 136 manat nəzərdə tutulur".

Bunu da iqtisadiyyat və sənayə nazirinin müavini Sevinc Həsənova dilə gətirib. Onun bildirdiyinə görə, 2016-cı ildə inflyasiyanın səviyyəsi 3,3 faiz proqnozlaşdırılır. Bununla yanaşı, 2016-cı ildə neftin hasilatının 40,7 milyon ton təşkil edəcəyi nəzərdə tutulur. Nazir müavini sonra qeyd edib ki, tikinti sektoru nəzərə alınmamaqla, qeyri-neft sektorunda 5,3 faiz artım gözlənilir.

"Həmçinin 2016-cı ildə qeyri-neft sənayesində 9 faiz, xidmət sektorunda 4,8 faiz artım nəzərdə tutulur" - deyə, S.Həsənova vurğulayıb.

Müzakirələr zamanı çıxış edən millət vəkili Vahid Əhmədov isə "Maliyyə nəzarəti haqqında" qanun layihəsinin vacibliyini dilə gətirib. Deputat qeyd edib ki, ölkənin bütün strukturlarında maliyyə nəzarətinin gücləndirilməsinə ehtiyac var:

"Çünki yerlərdə faktiki olaraq, maliyyə idarələri icra başçılarının tapşırıqlarını yerinə yetirirlər. Yəni maliyyə bölgüsü icra başçılarının az qala kefindən asılı olur. Düzdür, maliyyə naziri tərəfindən dəfələrlə bu məsələyə münasibət bildirilib, yerli maliyyə şöbələrinə ciddi tapşırıqlar verilir, amma fakt faktlığında qalır. Odur ki, nəhayət, parlamentdə bu istiqamətdə qanunun qəbuluna, başdan tutmuş ayağa qədər bütün strukturlarda maliyyə şəffaflığının təmin olunmasına, maliyyə nəzarətinin gücləndirilməsinə ehtiyac var".

V. Əhmədov bununla belə deyib ki, Azərbaycan manatın yumşaq devalvasiyası prosesinə keçmək lazımdır. V. Əhmədovun sözlərinə görə, gələn ilin dövlət büdcəsinin layihəsində manatın dollara qarşı məzənnəsi 1,05 manat səviyyəsində müəyyənləşib.

Deputat deyib ki, cari ilin fevralın 21-də baş verən devalvasiyadan sonra manat təxminən 35% ucuzlaşdı:

"Nəticədə əhali narahat olmağa başladı. İndi vəziyyət düzəlibmi? Azərbaycan Mərkəzi Bankı valyuta bazarına hələ də müdaxilə edir, intervensiya aparır. Devalvasiyadan qabaq Mərkəzi Bankın valyuta ehtiyatları 15 milyard manat idisə, hazırda 7,4 milyard manata enib. Ötən müddət ərzində Mərkəzi Bankın valyuta ehtiyatları kəskin azalıb. Aparılan intervensiya valyuta ehtiyatlarının kəskin azalmasına səbəb olur. Hesab edirəm ki, manatın məzənnəsinin bazar qiymətləri əsasında tənzimlənməsinə başlanılmalıdır. Əgər bu addım atılmasa, ciddi problemlərlə üzləşə bilərik" .

Sonda büdcə zərfi parlamentin plenar iclasına tövsiyə olunub.

Telegramda izləyin

instagramda izləyin