Rusiya Azərbaycana çox ağır və gözlənilməz sürprizlər hazırlayır

"Ermənistana veriləcək silah sırf Azərbaycana yönəlib".

Bunu Sonxeber.az-a hərbi-siyasi məsələlər üzrə ekspert, ehtiyatda olan polkovnik-leytenant Üzeyir Cəfərov Rusiyanın bir neçə aydan sonra Ermənistana "Tor" zenit-raket kompleksi (ZRK) verməsinə münasibət bildirərkən deyib.

Onun sözlərinə görə, Rusiyanın ümumiyyətlə ATƏT –in Minsk qrupunda həmsədrlik etməyə nə mənəvi, nə də hüquqi haqqı yoxdur: "Çünki Rusiya son vaxtlar olan-qalan hörmətini də itirib. Bir tərəfdən guya Dağlıq Qarabağ münaqişəsinin tənzimlənməsi ilə məşğul olur, digər tərəfdən isə Azərbaycan torpaqlarını işğal etmiş Ermənistana silah satır. BMT Təhlükəsizlik Şurasının üzvü olan ölkə Ermənistana ağır silahlar satır. Həmin silahlar Azərbaycan vətəndaşlarının, mülki və hərbi obyektlərinin məhvi üçün nəzərdə tutulub. Ona görə də Ermənistana veriləcək son silah bilavasitə Azərbaycan Silahlı Qüvvələri ilə mübarizə üçün nəzərdə tutulub".

Ekspert xatırladıb ki, Azərbaycanda bu cür silahlar çoxdan mövcuddur: "Soçidə Ermənistanın Baş naziri Nikol Paşinyan və Rusiya Prezidenti Vladimir Putin arasında görüşdən sonra gözləmək olardı ki, Ermənistana növbəti güzəştlər ediləcək. Bu güzəştlərdən məqsəd Ermənistanın könlünü almaqdır, ölkə rəhbərliyini Rusiyaya bir qədər yaxınlaşdırmaqdır. Ona görə də bu silahların davamı gələcək"
Ü. Cəfərov Dağlıq Qarabağ münaqişəsinin tənzimlənməsi üçün aparılan danışıqlardan heç vaxt heç nə gözləmədiyini və indi də gözləmədiyini deyib: "Bu məsələnin yeganə həlli güc tətbiq edərək işğal olunmuş əraziləri azad etməkdir. Bunun alternativ variantı yoxdur, sadəcə vaxt itiririk. Rusiyanın yeganə məqsədi Qarabağ münaqişəsinin həll edilməməsidir. Münaqişə həll olunarsa, Moskvanın Azərbaycan və Ermənistana siyasi, iqtisadi və hərbi təzyiq vasitələri əldən çıxacaq".

Onun sözlərinə görə, veriləcək silahın taktiki-texniki xarakterikasına baxsaq görərik ki, "Tor" ZRK Azərbaycan Hərbi Hava Qüvvələri və qouru qoşunlarına qarşı mübarizə üçün nəzərdə tutulmuş silahdır: "Bu, Rusiyanın həmsədrlik missiyası ilə qətiyyətlə uzlaşmayan hərəkətdir. Bunu dəfələrlə bəyan etmişik. Ancaq Rusiya həyasızlığından, vicdansızlığından və əclaflığından əl çəkmir".

Həmsöhbətim proqnozlaşdırır ki, Rusiya tərəfindən Azərbaycana çox ağır və gözlənilməz sürprizlər hazırlanır: "Bunu reallığı təhlil edərək deyirəm. Ermənistana bundan sonra da silahlar veriləcək, Azərbaycan vətəndaşları qətlə yetiriləcək, necə ki, Naxçıvanda əsgərimiz şəhid oldu".

Qeyd edək ki, "Tor" fövqəlmüasir ZRK-dır. O, avtomatim rejimdə, hətta şəxsi heyətin iştirakı olmadan istənilən spektr hava hücumları, o cümlədən yüksək dəqiqli raketlərlə mübarizə apara bilər.

Məftun Salmanov

Telegramda izləyin

instagramda izləyin