"Manatı özbaşına buraxsan dollar 2 manatdan çox olacaq"

"Azərbaycan və Türkiyə arasında ticarət faktiki olaraq xarici valyutalar, yəni dollar və ya avro vasitəsilə aparılır. Azərbaycan iqtisadiyyatı Türkiyə iqtisadiyyatı ilə müqayisədə çox kiçikdir. Bu baxımdan türk lirəsinin kəskin ucuzlaşmasının Azərbaycanın Türkiyəyə yatıracağı investisiyalarına ciddi təsir göstərməyəcək".

Bunu Sonxeber.az-a iqtisadçı ekspert Əkrəm Həsənov türk lirəsinin kəskin ucuzlaşmasının Azərbaycanın Türkiyəyə investisiya yatırmasına təsiretmə imkanlarını şərh edərkən deyib.

Onun sözlərinə görə, bir neçə il bundan əvvəl olsaydı, yəni Azərbaycanda manat devalvasiyaya uğramasaydı, əhalinin gəlirləri yüksək olsaydı, yəqin Azərbaycanın Türkiyəyə qoyuluşları artacaqdı, vətəndaşlarımız ora daha çox gedəcəkdi.

Ə. Həsənov qeyd edib ki, lakin hazırda Azərbacanda da iqtisadi vəziyyət o qədər yaxşı deyil: "Hamı bilir ki, bizdə də manatın məzənnəsi sünidir. Əgər manatın məzənnəsi özbaşına buraxılsa, yəni Mərkəzi Bankın nəzarətindən çıxsa, dollar iki manatdan da çox olacaq. Bunu hamı bilir".

Ekspert Türkiyədə lirənin kəskin ucuzlaşmasının əsas səbəbi kimi bu ölkənin Mərkəzi Bankının apardığı siyasəti göstərib: " Mərkəzi Bankın uçot dərəcəsi aşağı salmışdı ki, ölkədə pul həcmi azalmasın, kreditlər artsın, iqtisadiyyat inkişaf etsin. Ümumiyyətlə inkişaf etmiş ölkə üçün yerli valyutanın məzənnəsinin elə də böyük önəmi yoxdur. Çünki bu cür ölkələr daxili tələbatlarını öz istehsalı ilə ödəyirlər".

Məftun Salmanov

Telegramda izləyin

instagramda izləyin