Bağçadakı zorakılığa görə deputat ayağa qalxdı
Ötən gün azxeber.com saytı Yasamal rayonunda fəaliyyət göstərən "Kids Studio" özəl bağçasında uşaqlara qarşı zorakılığı əks etdirən görüntülər yayımlayıb. Video ciddi müzakirələrə səbəb olub. Bu görüntülər bağçaların yenidən Təhsil Nazirliyinin tabeliyinə qaytarılması məsələsini aktuallaşdırıb.
Bununla bağlı BiG.AZ-a açıqlama verən deputat Sona Əliyeva bildirib ki, özəl bağçalara tam nəzarət olunmur:
"Orada neqativ hallar baş verməsi mümkündür. Dövlət bağçalarında metodiki nəzarəti Təhsil Nazirliyi, maliyyə məsələlərinə isə yerli icra hakimiyyəti cavabdehdir. Bağçadan yayılan o görüntülərə münasibətim çox pisdir. Çünki uşağa şiddət, zorakılıq qəbuledilməzdir. Bu, uşağın psixologiyasında yaradacaq tramva gələcəkdə başqaları ilə münasibətində problemlər yaradacaq. Uşaqlar 6 yaşa kimi gördüklərini doğru kimi qəbul edir. Bu, uşaq üçün böyük tramvadır. İnanıram ki, bu gündən özəl bağçalarda buna diqqət ediləcək".
Deputat vurğulayıb ki, uşağa dil öyrətmək hələ uşağı tərbiyə etmək deyil:
"Uşağın düzgün tərbiyə eilməsi üçün o, gərək sağlam mənəvi mühitdə böyüsün. Valideynlər övladlarını bağçaya qoyurlar ki, uşaqlar orada şəxsiyyət kimi formalaşsın. Bilmədiyini öyrənsin, uşaqlarla ünsiyyətdə olub, cəmiyyətə inteqrasiya olsun. Bir sözlə sosiallaşsın. Uşağa bu cür şiddət törədən insan cəzalandırılmalı və nəzarətə götürülməlidir. Bununla bağlı qanunvericiliyimiz çox gözəl tənzimlənir. Qaldı ki, bağçalara nəzarət bütövlükdə Təhsil Nazirliyinə verilməsi qərarını cənab prezidentimiz verir. Buna müdaxiləni yersiz hesab edirəm".
Təhsil eksperti Kamran Əsədov qeyd edib ki, hal-hazırda ölkəmizdə 1656 dövlət (717 kənd, 939 şəhər), 96 qeyri-dövlət (95 şəhər, 1 kənd) məktəbəqədər təhsil müəssisəsi var:
"Danılmaz faktdır ki, bağçalar körpələrin təlim tərbiyəsində mühüm rol oynayır. Hər yaş dönəminin özünün xüsusiyyətləri, psixoloji, sosial, emosional standartları var. Uşaqlar o xüsusiyyətlərə, standartlara cavab verə-verə böyüyür. Beləcə, dünya praktikasında uşaq inkişafının standartları meydana çıxır. İndi həmin o standartların tətbiqi üçün bir müəssisə lazımdır. Lakin kiçik yaşlıların bağçalara cəlb olunması baxımından Azərbaycandakı göstəricilər dünya aparıcı dövlətlərlə müqayisədə çox aşağıdır. Hələ bağçaların sayının çox olduğu Bakı şəhərində məktəbəqədər yaş qrupunda olan uşaqların 25 faizi məktəbə bağçalardan gəlir. Təəssüflər olsun ki, maddi-texniki baza, binalar da bəs eləmir ki, digər 75 faizlik uşaq da bağçalara cəlb olunsun. Dünya təcrübəsindən qeyd edim ki, Amerikanı götürsək, bağçaların 80 faizi özəldir. Həmin bağçalarda olan şərait dövlət hesabında olan məktəbəqədər müəssisələrdən daha yaxşı qurulub. Dövlətin üzərinə az yük düşür.
Ekspert onu da söyləyib ki, on illərdə ölkədə məktəbəqədər təhsil müəssisələri dünya standarlarına yaxınlaşıb:
"Amma normativlər — uşaq bağçasının quruluşu, işləmə metodu, idarəedilməsi baxımından isə hələ dünya standarlarına cavab vermir. Bizim məktəbəqədər təhsil müəssisələrinin quruluşu ilə bağlı normativlər sovet dönəmində hazırlanan normativlər əsasında hazırlanıb. Bu gün də o normativlər tətbiq olunur. Bu günün reallıqları da o normativlərlə uyğunlaşmır. Məsələn, məktəbəqədər təhsil müəssisələrinin otaqlarının sahəsi ilə bağlı normativlər var. Tədris otağı 20, uşaq otağı isə 50 kvadratmetr olmalıdır.
Doğrudur, özəl bağçaları da istər qidalanma, istər tədris dövlət bağçaları ilə müqayisədə yaxşı təşkil olunub. Burda çalışan işçi – tərbiyəçilər uşaqlara daha həssas yanaşırlar. Lakin özəl bağçalar müstəqil kommersiya fəaliyyəti həyata keçirdiyi üçün hansısa təhsil qurumunun onun fəaliyyətinə müdaxilə etməsi, yoxlanılması mümkün deyil. Qanunvericilik yalnız onların təhlükəsizlik, vergi, sanitar qaydalara riayət edib-etməməsini yoxlaya bilir. Təəsüf ki, heç bir qurum bağçalarla bağlı yoxlama aparmır. Hesab edirəm ki, bağçalar Təhsil Nazirliyinə qaytarılmalı, ayrıca bir komitə yaradılmalıdır. Necə ki, Peşə təhsili agentliyi yaradıldı və bütün peşə təhsili vahid sistemə tabe edildi, bu, bağçalara da şamil edilməlidir. Bu həm də tədris vahidliyinin qorunması üçün labüddür".
Sonxeber.az Telegramda izləyin instagramda izləyin
Şikayətiniz varsa Whatsapp: 051 7028255
Facebookda Paylaş