Bizdə uçot dərəcəsi endirildi, ABŞ-da artırıldı: manatın reaksiyası
"Bu gözlənilən idi. ABŞ-ın qiymətli kağızlar bazarı buna hazırıydı".
Bunu Sonxeber.az-a Milli Məclisin deputatı Rüfət Quliyev iyunun 13-də ABŞ-ın Federal Ehtiyatlar Sisteminin (FED) uçot dərəcəsini 1,75- 2,0%-dək artırmasına münasibət bildirərkən deyib.
Onun sözlərinə görə, 2018-ci ilin əvvəlində FED-in uçot dərəcəsini 3, daha sonra isə 4 mərhələdə qaldırılacağı barədə informasiya yayılmışdı: "Buna görə də heç bir ajiotaj yoxdur".
Deputat qeyd edib ki, FED-in uçot dərəcəsinin artması ilk növbədə dolların güclənməsinə və ABŞ-dan dollar kütləsinin axınına gətirib çıxarır: " Pul axını ilk növbədə digər ölkələrin ərazisindəki Amerika banklarına olacaq. Bu pullar daha çox ABŞ-ın dövlət istiqrazlarının alınmasına ayrılacaq".
R. Quliyev bildirib ki, FED-in uçot dərəcəsini artırmasının üçüncü dünya ölkələri üçün müəyyən nüansları da var: "Adətən FED-in uçot dərəcəsini artırmasından sonra dünya bazarında neft və qazın, alüminiumun və digər malların qiymətində oynaqlıq olur və daha çox qiymətin aşağı düşməsinə meyillik yaranır. Bir daha deyirəm ki, iqtisadiyyat dünyası buna hazırıydı. Normal haldır. ABŞ hökuməti bu yolla ölkə iqtisadiyyatını sabitləşdirir".
FED-in məlum qərarından bir gün sonra Azərbaycan Mərkəzi Bankının (AMB) İdarə Heyətinin uçot dərəcəsini 11%-dən 10%-ə endirməsinə gəlincə, millət vəkili vurğulayıb ki, Azərbaycan və ABŞ-ın prioritetləri və hədəfləru başqadır: "Bizim məqsədimiz konkretdir".
Onun sözlərinə görə, AMB-nin uçot dərəcəsini endirməsi Azərbaycan manatının məzənnəsinə hansısa formada təsir etməməlidir: "Prinsip etibarı ilə bu, əvvəlcədən planlaşdırılmışdı. Diqqət yetirin ki, manatın məzənnəsi yarım ildən çoxdur stabildir. Nəzərə alsaq ki, Azərbaycanın tədiyə balansı 6 milyard manatdan çoxdur və nefin 1 barelinin qiyməti 70 dollardan aşağı düşmür, qeyri-neft sektorunun inkişafı üzrə göstəricilər proqnozlaşdırılandan artıqdır, buna görə uçot dərəcəsinin aşağı salınmasının manatın məzənnəsinə təsirindən danışmağa gərək yoxdur".
Məftun Salmanov
Sonxeber.az Telegramda izləyin instagramda izləyin
Şikayətiniz varsa Whatsapp: 051 7028255
Facebookda Paylaş