Bakıda işsizlərin sayı kəskin artıb, Naxçıvanda isə işsiz yoxdur

Bu il iyul ayının 1-i vəziyyətinə məşğulluq xidməti orqanları tərəfindən ölkə üzrə rəsmi işsiz statusu verilən şəxslərin sayı 36 min 597 nəfər olub, onların 36,9 faizini qadınlar təşkil edib.
Sonxeber.az-ın Dövlət Statistika Komitəsindən açıqlanan məlumatlara istinadən apardığı hesablama göstərir ki, işsiz statusu verilən şəxslərin sayı son 1 il ərzində 283 nəfər artıb. İşsizliyə görə müavinətin orta məbləği isə 28 manat 90 qəpik artaraq 287 manat 20 qəpik olub.

Qeyd edək ki, işsiz statusuna malik insanların təxminən yarısı - 19 min 274 nəfəri Bakı şəhərinin payına düşüb və son bir il ərzində 2 min 239 nəfər və ya 13,2% artıb.
Bakı şəhərindən sonra ən çox işsiz Bərdə, Mingəçevir, Sumqayıt, Gəncə şəhərlərində, Kəlbəcər və Ağdam rayonlarında qeydə alınıb. Bərdədə işsiz statusuna malik şəxslərin sayı 1008, Mingəçevirdə 1372, Sumqayıtda 1258, Kəlbəcərdə 883, Gəncədə 764, Ağdamda isə 748 nəfər olub.

İşsiz statusuna malik insanların ən az olduğu rayonlar arasında isə ilk yerlərdə Daşkəsən, Füzuli, Xocalı, Xocavand, Şuşa və Naftalan rayonları dayanır. Açıqlanan rəsmi məlumata görə, Daşkəsəndə 4, Füzulidə 14, Xocalıda 33, Xocavanddə 44, Şuşada 34, Naftalanda isə qeydiyyatdan keçən 54 işsiz insan var.
Azərbaycanda işsiz statusuna malik insanların yaşamadığı rayonlar arasında isə Naxçıvan Muxtar Respublikasına daxil olan rayonlar yer alır. Statistika Komitəsinin məlumatında göstərilir ki, Muxtar Respublikaya daxil olan Naxçıvan şəhəri, Şərur, Babək, Ordubad, Culfa, Kəngərli, Şahbuz və Sədərək rayonlarında bir nəfər də olsun işsiz statusuna malik insan yoxdur.

Telegramda izləyin

instagramda izləyin