Manat "təkbaşına üzərsə" nə olar?

Manat "təkbaşına üzərsə" nə olar?"Azərbaycan Mərkəzi Bankının məlumatına əsasən ölkədə üzən məzənnəyə keçid 2017-ci ilin əvvəlində olub. Bununla belə, üzən məzənnəyə tam keçildiyini iddia etmək doğru olmazdı. Çünki sabit məzənnənin olması ondan xəbər verir ki, üzən valyuta rejiminə tam olaraq keçilməyib".

Bunu Sonxeber.az-a iqtisadi ekspert Vüqar Bayramov İqtisadi İslahatların Təhlili və Kommunikasiya Mərkəzi tərəfindən hazırlanan monitorinq və qiymətləndirmə üzrə hesabatında 2020-ci ildən Azərbaycanda tam üzən məzənnə rejimi tətbiq olunacağına münasibət bildirərkən deyib.

Mərkəzi Bankın atmalı olduğu addımlar

V. Bayramov tam üzən məzənnəyə keçmək üçün bir neçə addımın atılmalı olduğuna diqqət çəkib: "2020-ci ilədək müddət ərzində Mərkəzi Bank valyuta bazarının liberallaşdırılması ilə bağlı fəaliyyətlər həyata keçirərsə, nəticədə Mərkəzi Bank üzən valyuta rejiminə keçə bilər. Yox əgər Mərkəzi Bank sabit məzənnəni qoruyub saxlamağa çalışacaqsa, üzən məzənnə rejiminə keçid kifayət qədər çətin olacaq. Çünki üzən məzənnə rejiminə keçid valyuta bazarının liberallaşdırılmasının aparılmasını tələb edir".

Manat neftin qiymətindən asılıdır

Bəs üzən məzənnə rejiminə tam keçid baş tutarsa, bunun manatın məzənnəsinə təsiri necə olacaq? Ekspert suala cavab olaraq bildirib ki, bu, 2020-ci ildə dünyada neftin qiymətindən və ölkədə aparılan islahatların sürətindən asılı olacaq: "İndidən 2020-ci ildə valyutaya olan tələbi proqnozlaşdırmaq nəinki çətindir, praktiki olaraq mümkün deyil. Çünki Azərbaycanda valyutaya olan tələbin dəyişməsi birbaşa neftin qiyməti ilə bağlıdır. Neftin dünya bazar qiyməti yüksək olarsa, valyutaya tələbin ödənilməsində imkanlar yaranır, aşağı olarsa valyutaya tələbin ödənilməsində çətinliklər formalaşır".

İnandırıcı görünmür

Həmsöhbətimin sözlərinə görə, mövcud siyasət təhlil edilsə, yaxın dövrlərdə tam üzən məzənnəyə keçid inandırıcı görünmür: "Üzən məzənnə rejiminə tam keçidlə bağlı real addımlar atılmayıb. Əgər bu reallaşarsa, manatın məzənnəsi birmənalı olaraq neftin dünya bazar qiymətindən asılı olacaq".

Məftun Salmanov

Sosial   Baxılıb: 6053   Tarix: 19 iyul 2018  

Şikayətiniz varsa Whatsapp: 050 3422489

Facebookda Paylaş



Unvan.az - elanlar sayti

DİGƏR MARAQLI XƏBƏRLƏR