Zəhərlənmə olan restoranın müdiri danışdı

"Tonqal" restoranı kütləvi zəhərlənmə hadisəsinə aydınlıq gətirib.

"Tonqal"ın işlətməçisi Fərhad müəllim (soyadını dədiqləşdirə bilmədik) aznews.az-a verdiyi açıqlamasında hadisənin baş verdiyini təsdiqləyib:

"Zəhərlənmə olub. Amma bir az şişirdiblər, yəni yazılanlar kimi deyil. Hazırda zəhərlənmənin baş vermə səbəbi araşdırılır. Analizlər götürülüb, hardasa 4-5 günə cavablar məlum olacaq. Mən müalicədəyəm, işə cıxmıram. İndi yemək yeyib, çimib ora gedəcəm".

Qeyd edək ki, 11.08.2018-ci il tarixində Bakı şəhəri, Nərimanov rayonu, Həsən Əliyev prospekti 82 ünvanında yerləşən "Tonqal" restoranında baş vermiş kütləvi zəhərlənmə hadisəsi ilə bağlı daxil olmuş məlumat əsasında Qida Təhlükəsizliyi Agentliyində dərhal operativ işçi qrupu yaradılmış, hadisənin baş verdiyi restoranda, zəhərlənən şəxslərin yerləşdirildiyi Klinik Tibbi Mərkəzdə və 2 saylı Uşaq Kliniki Xəstəxanasında qida təhlükəsizliyi araşdırmalarına başlanılmışdır.

İlkin məlumatlara əsasən, axşam saat 20:00 radələrində "Tonqal" restoranında iki ayrı masada qidalanan müxtəlif ailə üzvlərində bir neçə saatdan sonra zəhərlənmə əlamətləri baş vermişdir. Hadisə nəticəsində 3-ü azyaşlı olmaqla 13 nəfər zəhərlənib.

Mütəxəssislər tərəfindən xəstələrdən nümunələr götürülmüş və aidiyyatı üzrə laboratoriyaya göndərilmişdir. İlkin araşdırmalara görə zəhərlənməyə səbəb baytarlıq-sanitariya nəzarətindən keçirilməmiş ət və ət məhsullarından hazırlanan qidalar olmuşdur.

Bundan əlavə hadisənin baş verdiyi "Tonqal" restoranında müvafiq epidemoloji araşdırmalar aparılmış, bir sıra ciddi qida təhlükəsizliyi qaydalarının pozulduğu müəyyən olunmuş və faktla bağlı protokol tərtib edilmişdir.

Araşdırmalar davam etdirilir, araşdırmanın nəticəsi ilə bağlı geniş məlumat ictimaiyyətin diqqətinə çatdırılacaq.

Qeyd edək ki, zəhərlənən 13 nəfərdən 11-i aparılan müayinə və müalicələrdən sonra evə buraxılmış, 2 nəfər azyaşlının müalicəsi isə 2 saylı Uşaq Kliniki Xəstəxanasında davam etdirilir. Hazırda onların vəziyyəti qənaətbəxşdir.

Telegramda izləyin

instagramda izləyin