Paşinyan Putin qarşısında özünü qorxmaz cəngavər kimi göstərməyə çalışırdı

"Uzun onillər ərzində Ermənistanın siyasi həyatında bütün qüvvələr Dağlıq Qarabağın "müstəqilliyinin" tanınmasını bir nömrəli ideologiya kimi qeyd ediblər. Lakin sonrakı reallıqda bunu həyata keçirməyi qətiyyən bacarmayıblar. Həm də ona görə ki, Azərbaycanın işğal olunmuş rayonlarını hansı formada Dağlıq Qarabağın ərazisinə daxil edə bilməyin yollarını tapa bilməyiblər".

Bunu Sonxeber.az-a Milli Məclisin deputatı Zahid Oruc Ermənistanın Baş naziri Nikol Paşinyanın Dağlıq Qarabağ ətrafında işğal olunmuş yeddi rayonun qondarma "Dağlıq Qarabağ Respublikasının" tərkib hissəsi olduğuna dair sözlərini şərh edərkən deyib.

Çıxılmazlığın qapısında dayanıblar

Onun sözlərinə görə, Ermənistan siyasətində rəngindən, ideologoyasından, cəbhəsindən asılı olmayaraq əksər qüvvələr hakimiyyət astanasında bir bəyanat veriblər və ya ideologiya irəli sürüblər, iqtidara keçəndən sonra regional və beynəlxalq gerçəkliyi dərk etməyə başlayıblar: "Dağlıq Qarabağın tanınması məsələsində məlum çıxılmazlığın qapısında dayanıblar. Məsələ burasındadır ki, onlar Dağlıq Qarabağ ətrafında işğal olunmuş 7 rayonu hansı formada ərazi cəhətdən Qarabağın torpaqlarına əlavə edəcəklərini, bunu beynəlxalq hüquq subyekti kimi xarici məkanda necə tanıtdıracaqlarını bilmirlər. Bu sual olaraq onların qarşısında durub. Hətta bir qədər irəli gedib onu da deyək ki, vaxtilə "Ağdam i naşa rodina" sözünü də Qarabağın işğalında əsas hərbi canilərdən biri olan Serj Sarkisyan söyləmişdi".

Tiqranın yetirmələri titulu cəfəng olub

Millət vəkili qeyd edib ki, belə olan təqdirdə Paşinyanın jurnalist qiyafəsində bir dövlətə guya müstəqil xarakter vermək, özlərini Qarabağdakı hadisələrdən kənarda tutmaq, danışıqlarda ayrıca siyasi vahid kimi tanıtmaq istəyi alınmır: "Görünən mənzərə budur ki, Paşinyan bir tərəfdən Moskvada bəyan edir ki, o, Qarabağı Ermənistanın ayrılmaz hissəsi kimi görür və beləliklə sübuta yetirir ki, bu illər ərzində Qafqazın zümrüdü, öz xalqının silahlı qüvvvələri ilə dövlət quran cəngavərlər, Tiqranın yetirmələri titulları cəfəng olub. Həqiqətdə isə Ermənistanın məlum siyasi, yardımları və addımları olmasa, separatçı Dağlıq Qarabağın varlığından danışmaq real deyil".

Özünü Rusiyanın dayaqlarını çökdürməklə tanıdan

Z. Oruc bildirib ki, N. Paşinyan sanki sirkdə həkimlərin qoyduğu diaqonozdakı kimi firkirləşmə mahiyyətində özünü ortaya qoyur: "Yəni bir tərəfdən daxildə siyasi rəqiblərinə, köhnə düşmənlərinə, gələcəkdə ona mane olacaq partiya rəhbərlərinə müharibə açıb, digər tərəfdən isə Moskvaya gedən kimi özünü Serj Sarkisyan qiyafəsində təqdim edir. Ardınca bəyanat verir ki, biz çalışacağıq ki, danışıqlar prosesində Qarabağla bağlı məsələni onların özlərinin iradəsinə buraxaq. Azərbaycan Prezidenti İlham Əliyevin Rusiyaya ən yüksək səviyyəli səfəri baş tutdu, səfər çərçivəsində bir neçə sənəd imzalandı, ancaq bəlli deyil ki, Paşinyanın Moskva səfərində nə imzalandı, hansı səviyyəli görüşlər keçirildi, danışıqların mahiyyəti nədən ibarətiydi, gələcək perspektiv üçün hansı konsensus əldə olunub. Putinin köməkçisi söyləmişdi ki, çoxlu suallar yığılıb qalıb, bunu avtomatik olaraq nə demək olduğunu hamı başa düşür. Məsələnin digər önəmli tərəfi ondan ibarətdir ki, Rusiya qəti bir şəkildə Azərbaycanın hazırki addımlarını, onun yaradıcı mövqeyini və Moskva ilə formalaşan nizamı Paşinyanın bir səfərinə qurban verəsi deyil. Millətçi, inqilabçı, özünü Rusiyanın dayaqlarını çökdürməklə tanıdan, komandasının əskər üzvləri Sorosun maliyyəsinə bağlı olan Paşinyan Moskvada nə söyləyə bilər ki, sentyabrın 1-də Soçidə əldə olunmuş razılaşmaların üstündən xətt çəkilsin".

Ermənilər 100 il əvvəl olduğu kimi...

Onun sözlərinə görə, N. Paşinyan guya özünü qorxmaz bir cəngəvar olduğunu sübut etmək üçün Putinlə görüşdə sətiraltı olaraq ikitərəfli münasibətlərdə daxili işlərə qarışmama haqqında fikirlər söyləyib: "Ancaq hər kəsə bəllidir ki, Rusiya əlini çəksə, Ermənistan adlı siyasi vahid Qafqazda yox olar. Ona görə yox ki, Azərbaycan və Türkiyə bu məkanı ortadan götürər, əsla. Bu dövlətin özü-özlüyündə Rusiya çəkmələrindən kənarda hərbi qüvvə ilə ayağa qalxıb özünü qoruması mümkün deyil. Buna görə də ikitərəfi münasibətlərdə daxili işlərə qarışmama daha çox yəni Moskva bizdən əlini çək anlamına gəlir və üstəlik də Fransa Prezidenti Emmanuel Makronla görüş qarşısındadır. 100 il əvvəl ermənilər çarizm süquta uğrayanda imperiyanın yanından kənarlaşıb bolşeviklərə üz tutdular, Qərb aləmi ilə yaxınlaşmağa doğru getdikər, sonra gördülər ki, SSRİ dağılma ərəfəsindədir bu dəfə də Qərblə tərəfdaşlıq yollarını tapmağa çalışdılar. Ermənistanın hazırki hakimiyyətinin varlığı, iradəsi daha çox xarici lobbi mərkəzlərinə bağlı olduğuna görə Putin və Paşinyan arasında səmimi dostluq münasibətləri formalaşa bilməz, burada problemlər çox dərindir. Paşinyanın Dağlıq Qarabağ barədə dediyi bəyanatları dərin strateji fikirlər kimi dəyərləndirmək olmaz".

Məftun Salmanov

Telegramda izləyin

instagramda izləyin