Güclü leysandan "sağ çıxmayan" marşrut avtobusu oldumu? – RƏSMİ AÇIQLAMA

Sentyabrın 23-də Bakıya yağan güclü leysan nəticəsində "BakuBus" MMC-nin balansında olan və həmin gün xəttdə işləyən avtobuslardan heç biri istismara yararsız vəziyyətə düşməyib. Bunu Sonxeber.az-a Bakı Nəqliyyat Agentliyinin (BNA) İctimaiyyətlə əlaqələr və maarifləndirmə şöbəsinin müdiri Mais Ağayev güclü leysanın "Baku Bus" avtobuslarına zərər yetirmə ehtimalından danışarkən deyib.

Nasaz avtobuslara ilkin yardım

Onun sözlərinə görə, ötən gün əsasən bir neçə mərkəzi küçədə yağış sularının yığılması nəticəsində bəzi avtobusların hərəkətində müəyyən texniki nasazlıqlar əmələ gəlmişdi: "Lakın əraziyə çıxarılan texniki heyətin səyi nəticəsində nasaz avtobusların hərəkəti qısa müddət ərzində bərpa olunub. Daha sonra həmin avtobuslar istehsalat bazasına gətirilərək zəruri texniki tədbirlər görülüb və avtobusların hərəkəti bərpa edilib".

Ən çox avtobus hansı tərəfdə yolda qalmışdı?

Güclü leysan səbəbindən say etibarı ən çox avtobusun yolda qaldığı ərazi Ziya Bünyadov prospekti-Əhməd Rəcəbli küçəsinin kəsişməsindən Əliyar Əliyev küçəsinin kəsişməsindək olan hissə olub: "Qeyd edilən yollarda 7A və 7B nömrəli marşrut avtobusları nasazlıqla üzləşmişdilər. 4-5 avtobusda belə hal yaranmışdı. Texniki heyət həmin avtbosları öncə sistemdəki nasazlıqları aşkarlamaq üçün öncə müayinə edib, ardından elə ərazidəcə problem aradan qaldırılıb".

Ciddi problem olmayıb

M. Ağayev qeyd edib ki, ümumiyyətlə hər hansı avtobus marşrutunun sərnişinləri ünvana çatdırmaqla bağlı ciddi problemi olmayıb: "Çünki qeyri-iş günü olduğundan, sərnişin axını da azlıq təşkil etdiyindən ciddi çətinliklə üzləşilməyib". O diqqətə çatdırıb ki, güclü leysanın marşrut avtobuslarını tam yararsız vəziyyətə salması ilə bağlı hal aşkarlanmayıb: "Sadəcə olaraq bəzi marşrut avtobusları müəyyən müddət işləməyiblər. Əsas problem marşrut avtobuslarındakı elektrik sxemlərdən qaynaqlanmışdı və həmin nasazlıqlar da aradan qaldırılıb".

Məftun Salmanov

Telegramda izləyin

instagramda izləyin