Bu prospekt yenə bağlanır - SÜRÜCÜLƏRİN DİQQƏTİNƏ
Azərbaycan Avtomobil Yolları Dövlət Agentliyi (AAYDA) tərəfindən paytaxtın nəqliyyat sistemində mühüm əhəmiyyətə malik 9 kilometr uzunluqda olan Babək prospektinin yenidən qurulması işlərinin sonuncu mərhələsinə start verilib. Bu günən etibarən təmir çərçivəsində prospektdə nəqliyyatın hərəkəti məhdudlaşdırılıb.
Bu barədə Modern.az-a açıqlama verən AAYDA-nın mətbuat xidmətinin rəhbəri A.Nəcəfli bildirib ki, hazırda təmirin sonuncu mərhələsi həyata keçirilir:
"Bu gündən etibarən prospektə sonuncu qat asfalt vurulmağa başlanılıb. Ümumilikdə ikitərəfli olmaqla 18 km yola asfalt vurulacaq".
AAYDA rəsmisi işlərin təxminən 20 gün davam edəcəyini qeyd edib:
"Asfalt hissə-hissə vurulacaq. Məhdudlaşdırmalar da buna uyğun olaraq hissə-hissə ediləcək. Hər dəfə yolun təxminən 500 metrlik hissəsi bağlanıb asfaltlanacaq. Bu zaman hərəkət əks istiqamət üzrə ikitərəfli təmin olunacaq, yəni yol tam bağlanmayacaq. Amma bu gün prospektə giriş hissəni tam bağlamaq məcburiyyətində qaldıq. Çünki burada əsas körpülərdir. Bildiyiniz kimi, körpülər üzərində hərəkəti ikitərəfli təmin etmək olmur".
A.Nəcəfli prospektdəki son təmir işlərinin oktyabr ayının sonuna kimi tamamlanacağının nəzərdə tutulduğunu deyib.
Yenidənqurma işləri yeraltı kommunikasiya xətlərinin çəkilişi ilə məşğul olan qurumlarla birgə aparılır. Belə ki, prospekt boyunca4 km-ə yeni yaxın kanalizasiya kollektoru, 1000 və 800 mm diametrli polad borularla 7 km uzunluğunda əsas magistral, prospektin sağ və sol hissəsi ilə polietilen borularla 11 km uzunluğunda paylayıcı kəmərlər olmaqla, ümumilikdə 30 km-ə yaxın su xətti çəkilib. Bu işlər aidiyyəti qurum tərəfindən bir-neçə gün əvvəl yekunlaşdırılıb.
Bundan başqa, aparılan yenidənqurma zamanı səth sularının yolun hərəkət hissəsindən kənarlaşdırılması üçün mövcud yağış-kanalizasiya sistemi də bərpa olunur, zəruri olan yerlərdə yeni sistem qurulur. Bu işlərə uyğun olaraq prospektdə 99 nöqtədə kanalizasiya xətlərinin baxış qapaqları da yenilənib.
Layihəyə uyğun olaraq prospekt boyu vətəndaşların rahat və təhlükəsiz hərəkəti üçün köhnə piyada səkiləri bərpa olunur və 15 200 kv.m sahədə yeniləri tikilir, mövcud yol ayrıcı da sökülərək yenidən qurulur. Yol ayrıcının eninin kiçildilməsi prospektin hərəkət hissəsinin genişləndirilməsinə imkan yaradır. Belə ki, prospektin bir istiqamət üzrə hərəkət hissəsi 16 metrə qədər genişləndirilir. Yeni tikilən yol ayrıcının və piyada səkilərinin kənarlarına 26 350 p-metr uzunluğunda yeni səki daşları düzülür.
Yolun hərəkət hissəsi bərpa olan ərazilərə yeni asfalt-beton örtüyünün döşənməsi işləri davam etdirilir. Artıq prospektin 6 km-lik hissəsində asfalt-beton örtüyünün 2 layının döşənməsi işləri bitib. Hazırda qalan 3 km-lik hissədə bu işlər davam etdirilir. Ümumilikdə prospektin 323 609 kv.m sahəsinə 3 qat olmaqla yeni asfalt-beton örtüyünün döşənməsi nəzərdə tutulub.
Həmçinin prospektin yenidənqurulması zamanı avtobusların ümumi hərəkətə maneə yaratmadan dayanacaqlara giriş-çıxışını təmin etmək məqsədi ilə 22 yerdə xüsusi "cib"li hissələr tikilir, avtonəqliyyat vasitələrinin rahat və maneəsiz şəkildə geriyə dönməsi üçün əlavə zolaqlar və geridönmə hissələr yaradılır, həmçinin yolun işıqlandırılması üçün yol ayrıcında ikitərəfli yeni işıqlandırma sistemi qurulur.
Sonxeber.az Telegramda izləyin instagramda izləyin
Şikayətiniz varsa Whatsapp: 051 7028255
Facebookda Paylaş