İş elanlarında niyə daha çox xanımlara üstünlük verilir? -ekspert səbəbləri AÇIQLADI

İş elanlarında niyə daha çox xanımlara üstünlük verilir? -ekspert səbəbləri AÇIQLADI"Xanımların çalışdıqları sahələrdə əmək haqları daha aşağıdır". Bunu Sonxeber.az-a iqtisadçı ekspert Natiq Cəfərli iş elanlarında daha çox xanımlara üstünlük verilməsinə və bəzi peşələrdə xanımların dominantlıq etməsinə münasibət bildirərkən deyib.

Müəllimə xanımların dominantlığı

Ekspert sözlərini əsaslandırmaq üçün müəllimlik peşəsini misal göstərib: "Müəllimə işləmək istəyən xanımların çoxluğunu nəzərə alsaq, repititorluq və digər fəaliyyətləri olsa da, bu peşədə çalışanların rəsmi maaşları kifayət qədər aşağıdır. Azərbaycanda müəllimlərin orta aylıq maaşı çox aşağıdır, hətta ətraf ölkələrə nisbətən aşağıdır. Buna görə də bu sahədə xanımların üstünlük təşkil etdiyini, dominant olduğunu görmək mümkündür".

Bu sahələrdə kişilərin daha az işlədiyini görürük

N. Cəfərli bəzi iş yerləri ilə bağlı elanlarda xanımlara üstünlük verilməsi məsələsinə də toxunub. O bunu yenə maaşların azlığı və görüləcək işin özünəməxsusluğu ilə əlaqələndirib: "Yəni hansısa ofisdə yazı-pozu, kompüter işlərini görmək, yaxud hansısa formada ofis xidmətlərini göstərmək, habelə xanımlar üçün maaşların kifayət qədər aşağı olması bu sahəyə kişilərin daha az cəlbolunmasına səbəb olur. Bu sahələrdə kişilərin daha az işlədiyini görürük".

Amma yenə də kişilər...

Bununla belə, onun sözlərinə görə, ümumilikdə ölkədə muzdla işləyənlərin sayında kişilər üstünlük təşkil edirlər: "Ölkədə 1 mlyon 540 minə yaxın muzdla çalışanın 70 faizə yaxını kişidir. Müxtəlif sahələrdə çalışanlar arasında xanımların üstünlük təşkil etməsi aşağı maaşla, kişilərin həmin sahələrdə işləmək istəməməsi və digər sosial səbəblərlə də bağlı ola bilər".

Kişilərin katibə işləməsi...

N. Cəfərli əslində işə götürülərkən cinsiyyətə görə seçim edilməsini düzgün hesab etmir: "Peşəkarlığa, biliyə, bacarığa üstünlük verilməsi daha doğrudur. Ancaq reallıq da bundan ibarətdir ki, müəyyən sahələrdə, məsələn, ofislərdə çoxluq təşkil edən katibə vəzifəsi üçün iş yeri elanlarına kişilərin müraciət etməsi mümkün deyil və fikrimcə, doğru da olmazdı. Burada yerli adət-ənənələri də nəzərə almaq lazımdır. Davranış qaydaları da nəzərə alınmalıdır. Bu davranış qaydalarına görə o tipli işlərə daha çox xanımlar müraciət edir və həmin işlərə xanımlar daha çox götürülür".

Məftun Salmanov

Sosial   Baxılıb: 1654   Tarix: 17 oktyabr 2018  

Şikayətiniz varsa Whatsapp: 055 6620257

Facebookda Paylaş

Unvan.az - elanlar sayti

DİGƏR MARAQLI XƏBƏRLƏR