"Deputat maaş alır, halallıq baxımından..." - FAZİL MUSTAFA
"Deputatın səlahiyyətləri məhduddur. Azərbaycanda millət vəkili hamının təsəvvür etdiyi sovet deputatı kimi deyil ki, zəng edib hansısa problemini həll edəsən". Bunu Sonxeber.az-a Milli Məclisin deputatı Fazil Mustafa sosial şəbəkə istifadəçilərinin millət vəkillərindən narazı qalması, onları tənqid və təhqir etməsi məsələsinə münasibət bildirərkən deyib.
Deputat halallığı düşünməlidir
Onun sözlərinə görə, elə olur ki, millət vəkili hansısa problemi məmur səviyyəsində həll edə bilmir: "Ancaq deputat məsuliyyət daşıyan insandır. Səlahiyyəti az da olsa, maaş aldığına görə halallıq baxımından vətəndaş üçün gücü çatan səviyyədə çalışmalı, töhfə verməlidir. Mətbuatdan, vətəndaşdan qaçan deputatlar özlərinə güvənmirlər".
Millət vəkilinin yerində özünü görmək istəyənlər
Deputat qeyd edib ki, insanların deputatlardan narazı qalmasının başqa səbəbləri də var: "Belə ki, narazılıqda vətəndaşın natamamlığı ilə bağlı problemləri də üzə çıxır. Onun problemlərini qabardan deputata da yenə də həmin formada münasibət bəslənilir. Bu insanlar özünün uğursuzluğunun səbəbini onda görür ki, parlamentdə həmin deputatın yerində özü oturmalıydı. Təqribən belə yanaşma var".
"Facebook" tüfeyliləri təbəqəsi yaranıb
F. Mustafa bildirib: "Bu insana deyirsən ki, məndən yaxşımı bu fikri ifadə edəssən, yoxsa məndən daha yaxşı vicdanlı olacaqsan? Cavab verə bilmir. Azərbaycanda "Facebook" tüfeyliləri təbəqəsi yaranıb. Xalq hərəkatı dövründə Xalq Cəbhəsinin və ya başqa yerlərin qarşısında boş-bekar adamlar dururdu. Bunların əsas işi şayiə yaymaqıydı. Təqribən o insanların bir qismi, sonra isə boş, fəaliyyəti olmayan insanlar "Facebook"a dolub. Bunlar yaradıcı insan tipləri deyillər. Bunlar söz, fikir deyən adamları necə boğmaq barədə düşünürlər".
Ay, geri zəkalılar...
Millət vəkili sözlərinə əsas kimi Həbib Nurməhəmmədovla bağlı "Facebook"da öz düşüncələrini paylaşandan sonra əleyhinə deyilən fikirləri misal göstərib: "Yazmışdım ki, Həbib böyük qəhrəmandır, öz biləyinin haqqı ilə qələbə qazandı, lakin fərqli davransaydı dünyada vəhşi müsəlman obrazını dəyişə bilərdi. O, tullanıb başqasını döyməsəydi, udduğu döyüşçünün əlini sıxsaydı Amerika cəmiyyətində, xristian dünyasında müsəlmanın nə qədər humanist olduğunu, yəni peyğəmbər əxlaqlı olduğunu göstərərdi. Bunu əleyhimə yazı kimi paylaşıblar və deyirlər ki, sən niyə deputatsan. Mən də deyirəm ki, ay, geri zəkalılar mənim mətnimə baxın. Sizin mənim şəxsiyyətimi təhlil etməyə nə mənəvi haqqınız var, nə də üstünlüyünüz var. Mətn qalır bir tərəfdə. Çünki mətn oxumaq vərdişi yoxdur".
Hamı şifahi dedi-qodu ilə məşğuldur
Deputat hesab edir ki, tariximizdə "Dədə Qorqud"dan başqa əsər yoxdur: "Yəni yazı mətni yoxdur. Hamı şifahi dedi-qodu ilə məşğuldur. Tarixən babalarımız da elə olub, biz də elə olmuşuq. Heç nəyi qeydə almamışıq. Yazı tənbəlliyimiz var. Ona görə yazıçımızı dünyaya çıxarda bilmirik. Çingiz Aytmatov yetişdirə bilmirik. İstedadlı yazar sonadək gedə bilmir. 60-70 yaşını ötdükdən sonra müdrikləşə bilmir. Konkret işə yönələn adamları cəmiyyət üçün nümunə göstərməliyik".
Uğursuz insan üçün hamı nifrət obyektidir
Bununla belə o, diqqətə çatdırıb ki, insanların deputatlara münasibətdə haqlı tələbləri də var: "Təbii ki, insanların standartlarına uyğun olmayan, başını girdələyən insanlara neqativ münasibətləri normal qarşılamaq lazımdır. Lakin bu münasibəti kütləviləşdirmək doğru deyil. Adətən bu cür münasibəti uğursuz insanlar göstərirlər. Uğursuz insan üçün hamı nifrət obyektidir. Buna görə də ittihamların obyektivliyi böyük narazıçılıq doğurur. Ona görə də cəmiyyətdə ziyalı gildiyasını formalaşdırmağa ehtiyac var. Təbii ki, sosial problemlər var. Narazılığın kökündə insanın buraxdığı fürsətlər var. Anadolu türklərinin bir sözü var: şans hazırlıklı kafalara yardımçı olur. Şans hamıya düşür, lakin sənin dünya görüşün yoxdursa, o şansı əldən verirsən".
Məftun Salmanov
Sonxeber.az Telegramda izləyin instagramda izləyin
Şikayətiniz varsa Whatsapp: 051 7028255
Facebookda Paylaş