"Abel müəllimin xahişilə onun bir qardaşı yanımda..." - BDU-nun eks rektoru haqda daha bir açıqlama

""İndi kimin əlində vəzifə varsa, bu imkandan istifadə edərək qanunsuz yolla pul qazanmalı olduğunu düşünür. Təəssüf ki, iradəcə zəif olanlar vəzifə tutduqca daha da tamahkar olurlar".

Sonxeber.az bildirir ki, sfera.az-a açıqlamasında bu sözləri BDU-nun sabiq rektoru Abel Məhərrəmovun timsalında bir çox yüksək çinli məmurların tutduğu vəzifə ilə tərs-mütənasib olaraq, qeyri-etik davranış və hərəkətlər nümayiş etdirməkdə davam etdirmələrinə münasibət bildirərkən sosioloq Əhməd Qəşəmoğlu deyib.

Həmsöhbətimizin fikrincə, bütün hallarda kimliyindən asılı olmayaraq vəzifə tutan şəxslərin özünü belə biabır etmələrinin günahı insanın özündədir:

"Abel Məhərrəmovu kifayət qədər yaxından tanıyıram. Tələbəlik dövründən aramızda sıx münasibətlər olub. Onun ailəsini də tanıyıram. Çox gözəl ailə üzvləri var. Abel müəllimin xahişilə onun bir qardaşı uzun müddət yanımda işləyib. Yəni demək istəyirəm ki, bu ailə əməksevər ailə idi. Ona görə də yüksək rütbəli məmur və nazirlərin həmin postda olduğu müddətdə tutduğu vəzifəyə tamamilə zidd hərəkətlərə, əməllərə yol vermələri və rəzil vəziyyətə düşmələrinin səbəbini mühitdə də axtarmaq lazımdır. İndiki şəraitdə kimin əlində vəzifə varsa, bu imkandan istifadə edərək qanunsuz yolla pul qazanmalı olduğunu düşünür. Təəssüf ki, iradəcə zəif olanlar da buna uyaraq, vəzifə tutduqca daha da tamahkar olurlar. Tamah artıq olduqca da, insan beyni də nəfsinə uyğun fəaliyyət göstərmək istiqamətində işləyir. Nəticədə sonda adamı belə pis vəziyyətə qoyur. Abel müəllim o qədər ad-san qazanmışdı. İndi bu kimi biabırçılıqla yekunlaşmasından təəssüflənirəm. Bütün hallarda günah insanın özündədir. Bütün dinlər, o cümlədən İslam dinində də nəfsin qorunması tövsiyyə edilir. İnsan nəfsinə qalib gələ bilməyəndə sonda belə bir biabırçılıqla üzləşir".

Qeyd edək ki, Azərbaycanda hələ də bir çox məmurlar tutduqları vəzifəyə dövlətə xidmət kimi deyil, gəlir mənbəyi kimi baxaraq, bəzi hallarda qanuna-zidd əməllərə yol verirlər. Belə tamahkarlığa yol verənlərdən biri də BDU-nun sabiq rektoru Abel Məhərrəmov olub. Onu da vurğulayaq ki, A. Məhərrəmov artıq Prezident İlham Əliyevin sərəncamı ilə vəzifəsindən azad olunub. A. Məhərrəmovun bu ilin noyabrın 3-də Madriddə tolerantlıq mövzusunda keçirilən konfransda iştirakı fonunda restoranların birində içərək dava saldığı bildirilir. Həmçinin, onun İspaniyaya və geriyə çaxır daşıdığı məlum olub. Onun səfir olan oğlu Anar Məhərrəmov isə diplomatik toxunulmazlığından biznes maraqları naminə sui-istifadə edib. Xatırladaq ki, A. Məhərrəmov 1999-cu ildən BDU-nun rektoru vəzifəsində çalışıb.

Telegramda izləyin

instagramda izləyin