Yeni qayda devalvasiyanın ağır nəticəsidir - EKSPERT RƏYİ

"İdxal-ixrac əməliyyatı ilə məşğul olanlar istisna təşkil edir. Onlar daşınmaz əmlak üçün xarici valyutada kredit götürə bilərlər. İdxal-ixracla məşğul olmayanların isə yalnız milli valyutada kredit götürülməsinə icazə verilir". Bunu Sonxeber.az-a "MBA Group" konsaltinq şirkətinin baş direktoru Nüsrət İbrahimov daşınmaz əmlak krediti ilə bağlı yeni qaydalara münasibət bildirərkən deyib.

Xatırladaq ki, Maliyyə Bazarlarına Nəzarət Palatası (MBNP) "Bir borcalan və ya bir-biri ilə əlaqədar borcalanlar qrupu üzrə kredit risklərinin tənzimlənməsi haqqında Qaydalar"ı təsdiqləyib. Qaydalara görə, daşınmaz əmlak krediti yalnız milli valyutada verilir. Bu kreditlərdə kredit zəmanət əmsalı 70%-dən artıq olmamalıdır.

Onun sözlərinə görə, bu yeni qayda daşınmaz əmlak bazarına bahalaşma və ya ucuzlaşma üzrə heç bir təsiri etməyəcək: "Onsuz da daşınmaz əmlak bazarında bağlanan bütün əqdlər milli valyutada, yəni manatla aparılır. Əksinə manatla daha sərfəlidir. Krediti xarici valyutada götürərkən isə onu valyuta məntəqəsində dəyişib manata çevirmək lazımdır ki, bu zaman müəyyən ödənişlər edilir və itkilər yaranır. Fikrimcə, heç bir təsiri yoxdur, əksinə yaxşı haldır. Gələcəkdə də vətəndaşlar krediti qaytararkən risk yaranmır, yəni manatın məzənnəsi oynayanda mövcud problemlər olmur".

Yeni qaydanın nəyə hesablandığına gəlincə, N. İbrahimov qeyd edib ki, bu yeni qayda 2015-ci ilin ağır təcrübəsinin, yəni manatın dollar qarşısında kəskin ucuzlaşmasının nəticəsidir: "Vətəndaşlar krediti xarici valyuta ilə götürür, sonra isə onu qaytara bilmir".

Məftun Salmanov

Telegramda izləyin

instagramda izləyin