Deputat adı korrupsiyada hallanan Rüfət Aslanlıdan danışdı: bu insan bacarmadı

"Maliyyə Bazarlarına Nəzarət Palatası Direktorlar Şurasının keçmiş sədri Rüfət Aslanlı həqiqətən çox təvazükar, bilikli, savadlı insandır, ingilis, rus və Azərbaycan dillərini bilir". Bunu Sonxeber.az-a Milli Məclisin deputatı Rüfət Quliyev R. Aslanlının adınının korrupsiya qalmaqallarında hallanmasına münasibət bildirərkən deyib.

Bununla belə, millət vəkili hesab edir ki, R. Aslanlı üçün götürdüyü yükü qaldırmaq çətiniydi: "Bu insan sadəcə olaraq bacarmadı. Bacarmamaq isə başqa məsələdir".

R. Quliyevin sözlərinə görə, ancaq onun savadına, biliyinə şəkk-şübhə yoxdur: "Rüfət Quliyev Milli Məclisin komitə iclaslarına dəfələrlə gəlib, çıxış edib. Onun çıxışına, davranışına, biliyinə və savadına biz deputatlar heyran qalmışıq".

O ki qaldı korrupsiya iddialarına, deputatın fikrincə, bu, artıq onunla dövlət arasında olan problemlərdir: "Rüfət Aslanlının iddia edilən qanun pozuntularına dövlət cavab verməlidir".

Qeyd edək ki, R.Aslanlının adı dəfələrlə müxtəlif korrupsiya qalmaqallarında iştirakda hallanıb. Daha əvvəl KİV keçmiş məmura aid olan bahalı saat və avtomobil kolleksiyaları haqda yazırdı. R. Aslanlının, həmçinin Fransada şəxsi üzümlük sahələrinə malik olduğu və orada öz adını daşıyan şərab buraxdığı iddia olunur.

Məftun Salmanov

Telegramda izləyin

instagramda izləyin