"AzTV-ni şəxsi bostanına çevirmişdi, İTV-ni də bir az bostana çevirdi"

"Azərbaycan Dövlət Televiziyasına (AzTV) əlavə vəsaitin ayrılmasının mənası yoxdur, çünki İctimai Televiziya (İTV) fəaliyyət göstərir. İTV, həmçinin digər bütün telekanallar onsuz da dövlətin siyasətini təbliğ edir". Bunu Sonxeber.az-a Milli Məclisin deputatı Fazil Mustafa Azərbaycanda dövlət televiziyasına ehtiyacın olub-olmaması məsələsinə münasibət bildirərkən deyib.

Onun sözlərinə görə, xüsusən İTV modelində yeni vahid telekanalın yaradılması vacibdir: "Bu istiqamətdə düşünmək və islahatlar aparmaq lazımdır. AzTV-də işləyən jurnalistlər və s. məsələlər də nəzərə alınmalıdır. Bir çox ölkədə rəsmi televiziya kanalı fəaliyyət göstərir. Məsələn, Türkiyədə TRT nümunəsini göstərmək olar. Amma bunlar daha geniş məkan üçün nəzərdə tutulan, auditoriyası geniş olan telekanallardır. Bizdə də bu istiqamətdə düşünmək olar".

Arif Alışanovun AzTV-nin sədri vəzifəsindən çıxarılması məsələsinə gəlincə, millət vəkili əmin olduğunu bildirib ki, bütövlükdə bundan sonra AzTV-də dünya görüşü, düşüncə tərzi baxımından A.Alışanov kimi tipajda adam olmayacaq: "O həm də Milli Məclisə qarşı ən böyük hörmətsizliyi göstərirdi. Milli Məclisin iclaslarında gedən müzakirələri telekanalda təqdim etməyi özünün borcu kimi baxmırdı. AzTV-ni şəxsi bostanına çevirmişdi, İTV-ni də bir az bostana çevirdi. Cəmil Quliyev İTV-nin sədri təyin ediləndən sonra onu da qoymadı işləməyə. Oranı da çevirdi ancaq pul yığmaq vasitəsinə. Buna görə də bu telekanalların reytinqini, baxımlılığını çox aşağı saldı".

F. Mustafa əlavə edib: "Ümid edək ki, heç olmasa bundan sonra normal və yeni dünya görüşünə və düşüncəyə sahib insanların bura təyin olunması baş verəcək. AzTV-nin sədrinin səlahiyyətlərini icra edən Rövşən Məmmədov gənc olmasına baxmayaraq, kifayət qədər təcrübəlidir, uzun müddət müxtəlif televiziyalarda verilişlər aparıb. Bütün hallarda Arif Alışanovdan daha müsbət imic təqdim edəcək".

Məftun Salmanov

Telegramda izləyin

instagramda izləyin